Shillong, Lber 28 : Ka Meghalaya Pradesh Congress Committee (MPCC) hynne ka sngi Ba-ar, kala pynlong iaka jingiakhih kaba jai jai ha Shillong, ban pynrem jur iaka jingleh donbor jong ka sorkar NDA kaba lam sha ka jingshah mait kyrteng u Rahul Gandhi kum u MP ka Lok Sabha.
Ki nongialam ka seng Congress ryngkat ka jingdonlang ki MLA ba kynthup ia u Bah RV Lyngdoh, u Saleng Sangma, u Dr C Lyngdoh bad u Bah Charles Marngar kila pynlong iaka jing pyrta slogan bad rah ia ki jingthoh ban pynrem jur halor ka jingshah mait kyrteng u Rahul Gandhi bad kila pynrem ruh iaka sorkar NDA kaba la ialam da u Myntri Rangbahduh ka ri u Narendra Modi bad u Myntri Kam pohiing ka ri u Amit Shah ba katei ka jingshah leh jongu Rahul Gandhi kadei ka jingthombor iaka hok jong ka synshar khadar bad iaka hok ban pynpaw iaka jingsngew kaba laitluid hapoh ka ri.
Hba kren ha katei ka jingialang, u Bah RV Lyngdoh ula ong, ka sorkar pdeng ka kwah ban thombor iaka jingshisha kaba u Rahul Gandhi ula kren bad rah ha ka Parliament bad ha kiwei kiwei ki rynsan halor ka jingbym biang ka rukom synshar khaddar bad ka jingthombor ha kaba iadei bad ka riti synshar.
Ula ong, ka long kaei kaei ka bym lah ban pdiang ba u nongialam uba la shah jied ha ki paidbah yn shah weng noh naka jinglong dkhot hapoh ka Parliament
U Bah Lyngdoh, ula ong, ka BJP ka tieng bad ka pyrshang ban set iaka shyntur jong u Rahul Gandhi uba sdang ban pyniatylli iaka ri baroh kawei lyngba ka Bharat Jodo Yatra.
Ula ong, kane ka jingiakhih kadei kum ka jingpynpaw iaka jingsngewlem ia u Rahul Gandhi uba la shah rai pynrem da kaba shah set ha phatok ar snem namar ka kynthoh pyrshah ia u Modi ha u snem 2019 da kaba ong, kumno baroh ki nongtuh ki don da kajuh ka jait Modi.
U Bah Lyngdoh ula pynshai ba ka jingbym lah ban pynlong iaka jingiakhih kaba heh, kadei namar ba ki MLA ka seng Congress ki dang bunkam ha ka jingiashimbynta haka Dorbar Mang Tyngka hynrei ula ong pat, ba kane ka jingiakhih kan iai bteng haduh ban da ioh iaka hok.
Pule lang ia kane: Pynkhamti arkam ka Sorkar ia ki Nongtrei ka Nongstoin bad Mawshynrut Block
