Shillong, Lber 28 : Ka A.chik Conscious Holistically Integrated Krima (ACHIK) kala pynrem jur ia ka seng sain pyrthei Voice of the People Party (VPP) halor ka jingthmu ban pynlong ia ka rally pyrshah ia ka Roster System jong ka Reservation Policy ka Jylla haba kyrmen ba kane ka seng sain pyrthei kan don ia ka jingsngew lem kaba dei.
Ka Legal Counsel Bernita Rangsa Marak jong ka ACHIK, kala pynpaw ia ka jingsngewkhia halor ka sienjam bala shim da ka VPP pyrshah ia ka Roster System bad kynnoh ba kane ka seng sain pyrthei ka don jingthmu ban wanrah ia ka jingsngew iapher jaidbynriew hapdeng ki shipara jong ka Jylla Meghalaya bad ban pynshlur ia ka jingleh shiliang ia katto katne ki paid riewlum ka Jylla.
Kat kum ka jingong jong ka, ka Roster System kaba la bthah ban pyntreikam da ka Iingkashari Meghalaya High Court haba iadei bad ka bhah thungkam, ka long ban tehlakam ia ka jingleh bym hok bad pynkut ia ka jingbamsap nalor ban pynieng rasong ia ka bhah thungkam ka Jylla (Job Reservation Policy) kat kum ki jingshem jong ka.
“ Ka ACHIK ka pynrem jur ia ka sienjam jong ka VPP ban pynlong ia ka rally pyrshah ia ka Roster System bad kyrmen ia ka jingsngew lem kaba bha” ong ka Bernita.
Kat kum ka jingong jong ka, ka jingshem na ka jingwad bniah la lap ba ka bhah iohkam jong ki Garo kam long satia kat kum ka bhah kaba dei ban ioh kaba kot tang 33 % bad ia kane la pdiang ruh da ka Iingkashari High Court bad dei namar kata, ka bthah ban pyntreikam ia ka Roster System ha ka State Reservation Policy ka Jylla.
“Ka sur ba pyrshah ia ka hukum jong ka Iingkashari ka dei kaba iaid pyrshah (contempt) ia ka hukum” ong ka Bernita kaba dei ka nongsaid ain.
Kala ong ruh ba ka ACHIK kan pynthikna ba ka sienjam bala shim da ka VPP pyrshah ia ka hukum jong ka Iingkashari kan nym iohi ia ka jingieng pyrshah na baroh ki paidbah ka Ri-lum Garo.
