Shillong, Nailur 12: U Myntri ba khmih ia ka Tnad Community & Rural Development (C&RD) Bah Hamletson Dohling hynne ka sngi Nyngkong, ula pyntip ba ka Sorkar Pdeng kala shah mynta ban pyntreikam ia ka Mahatma Gandhi National Rural Employment Guarantee Schemes (MGNREGS) ha ki jaka ba hap hapoh ka Census Town jong ka Jylla.
Haba jubab ia ka jingkylli ha ka Dorbar Synrai jong ka Iingdorbar Thaw Ain, u Bah Hamlet ula pyntip ba ula iakren ia kane ka kam bad ka Sorkar Pdeng bad kyrpad ia ka jingdonkam ban pyniar ia ka jylli treikam jong ka MGNREGS sha ki Census Town.
Kane ka long ruh hadien kiba bun ki jingkyrpad na ki Nongthaw Ain namar ka jingjop ha ka jingpyntrei kam ia ka skhim ha ki jaka nongkyndong.
“Nga la aiti ia artylli ki shithi sha u Myntri ka Sorkar Pdeng bad nga sngewkmen ban pyntip ba u la ai ka jubab kaba sngewtynnad ba ia kane ka skhim la lah ban pyntrei ha ki jaka ba hap hapoh ka Census Town jongka Jylla” ula ong.
Haba sot ia ki pasoh jong ka shithi na ka Ministry, u Myntri ula ong “ka MGNREGA ka lah ban treikam (tang) ha ki Census Town ki bym pat shym la pynbna kum ki Urban Bodies ne Contonments”.
Haba jubab ia ka jingkylli bala wanrah da u MLA ka Mawlai Bah PT Sawkmie, u Bah Hamlet ula ong ba kane ka skhim kan sa sdang treikam noh shen ha Mawlai Census Town. U pyntip ba ka Tnad ka la shong bishar mynta ban pyntreikam ia ka skhim ha ki 13 na ki 15 tylli ki Shnong jong ka Mawlai Census Town.
Haba u MLA ka Umroi Bah George B Lyngdoh ula pan jingpynshai halor ka jingslem ban pyllait ia ka pisa sha ki Village Employment Council (VEC), u Myntri u pyntip ba la bthah da kaba shai kdar sha baroh ki BDO ba kin pyllait noh ia baroh ka pisa sha ki VEC.
“Kat haba don pisa ka tnad, la bthah ia ki BDO ban siew khuid noh ia ka pisa” ula ong haba pyntip ba ki dang don ki Bill ba sahteng wat naduh u snem 2018 ha kaba la pyrshang mynta ban pyllait noh kham kloi.
Shuwa kane, u Bah Hamlet u pyntip ba ha une u snem mang tyngka ba mynta, ka Jylla kala ioh ia ka song pisa ba kot T. 741.27 klur bad ka jingpynlut tang ha kaba siew bainong sngi kala kot ia ka T. 107.46 klur bad ia ka bai tiar pat la kot T. 316.63 klur”.
U la ong b aka Sorkar Pdeng kala ot ia katto katne percent jong ka MGNREGS ha ka Jylla kaba dei jong une u snem mang tyngka.
Ula pyntip ruh ba ki Bill ba dang sahteng jong ka bai tiar ha East Khasi Hills District kala kot haduh T. 40.47 klur.
