Kohima, Risaw 21 :Ka NSCN-IM la kynnoh ba kala kyntu ia ka jingtuklar lem jong ka China na ka bynta ban lah ban weng noh kham kloi ia ki jingeh sain hima sima kiba ki jaidbynriew Naga ki iakynduh.
Ka NSCN-IM kala khot ia ka jingtuklar lem ka kynhun kaba lai ban lah ban weng ia ka jingeh halor ka jingiateh jingsuk hapdeng kane ka kynhun kieng atiar bad ka sorkar India.
Na ka liang ka NSCN-IM kala kynnoh ruh ia ka sorkar India halor ka jingrandien na ki sienjam kiba kala dep ban ia mynjur.Ia kane ka jingiamynjur la iasoi hapdeng ki nongialam ka NSCN-IM bad ka sorkar India ha ka 3 tarik u Nailar 2015.
Ia kine baroh la pynpaw ha ka shithi na ka tnat kam bar ri jong ka NSCN-IM sha ka Communist Party of China (CPC).
“Ka sorkar India kala randien na ka jingmynjur kaba la dep.Kane kala pynthud ban pyniaid shakhmat ia ki lynti jong ka jingiakren kaba thmu ban pynkut noh ia ki kynrum kynram sain hima,” ong ka jingthoh ka NSCN-IM sha ka CPC.
Kala ong ruh: “Kumta ka long kaba donkam ia ka jingtuklar lem jong ka kynhun kaba lai ka ban lah ban weng nh ia kane ka jingeh.” Ka NSCN-IM kala ai khublei ruh ia ka China halor ka jingkyrshan ha kaba iadei bad ki hok halor ka sain hima sima jong ki Naga.
“Ngim pat lah ban klet ia ka jingieit bad ka jingkyrshan jong ki nongshong shnong ka China halor ka jingialeh ka jong ngi ban ioh iala ka jong ka jinglaitluid naduh ki snem 1950,” ong shuh shuh ka NSCN-IM.Kala ong ruh; “Ngi sngewnguh shibun ia ki nongshong shnong ka China kiba dang bteng ban ai ka jingkyrshan ha kane ka jingialeh ka jong ngi.”
Lah ban kdew ba ka jingiakren iasuk hapdeng ka NSCN-IM bad ka sorkar India halor ki mat kiba iadei bad ka sain hima sima jong ki Naga kala shu sahkut noh naduh u bnai Jymmang mynta u snem.
Na ka liang ka NSCN-IM kala ieng skhem ha la ka jong ka nongrim kaba iadei bad la ka jong ka lama jong ki Naga bad halor ki riti synshar khadar.
Ha kawei pat ka bynta, ki khubor ki pynpaw ba na ka liang ka sorkar India ka dang pynkhreh ban pynrung ia ki riti synshar khadar jong ki Naga ia kaba la tip kum ka ‘Yehzabo’ hapoh ka riti synshar jong ka ri India.
Ha kajuh ka por ki khubor kila kam ruh ba na ka liang ka sorkar pdeng kala mynjur na ka bynta ban pdiang ha kaba iadei bad ka lama kaba iadei na ka bynta ki nongshong shnong bad ka kolshor jong ki Naga.
Ka sorkar pdeng kala pynlong ia ki artylli ki jingiakren kiba la ka jong bad ka NSCN-IM naduh u snem 1997 kumjuh bad ka Naga National Political Groups (NNPGs) kaba kynthup ia ki hynniew tylli ki kynhun seng naduh ka snem 2017.
Ka sorkar pdeng kala iasoi ia ka jingiamynjur bad ka NSCN-IM ha ka 3 tarik Nailar 2015, bad ha kajuh ka por kala rung sha ka jingiamynjur bad ka NNPGs ha u bnai Nohprah 2017.
