Itanagar, Risaw 24 :Ka jingwad ban lapdien ia ka black box (flight recorder) jong ka liengsuin helicopter ka tnat shipai Indian Army kaba la hap noh ha ki jaka lum ba long riat ha Arunachal Pradesh ha ka 21 tarik mynta u bnai ka dang iai bteng.
Katkum ki khubor, ki bor shipai na ka 21 para special forces (SF) jong ka Indian Army kila wan poi ha katei ka jaka ba la jia ka jinghap liengsuin ha Arunachal Pradesh na ka bynta ban pynlong ka jingwad ia ka black box jong kane ka liengsuin.
Ha ka 21 tarik mynta u bnai, ka liengsuin advanced light helicopter (ALH) jong ka Indian Army ha ryngkat ki san ngut ki dkhot kiba don hapoh jong ka, kata kaba kynthup ia arngut ki pilot kala hap noh ha ka jaka lum ba long riat hapoh ka shnong Migging ha Upper Siang district ka Arunachal Pradesh.
Ia kane ka jaka ba la jia kane ka jinghap liengsuin la tip kum ka Singging kaba don hajan khappud ka India -China hapoh Arunachal Pradesh.Ka jingthut hapoh ka liengsuin la suba ba kadei ka daw kaba la pynlong ia kane ka liengsuin ba kan hap ha katei ka jaka.
Hashwa ba kane ka liengsuin kan hap khyndew, na ka liang ka tnat Air Traffic Control (ATC) kala ioh pdiang ia ka jingpan jingiarap kaba pyni ba kala don ka jingthut hapoh kane ka liengsuin shwa ba kan hap khyndew.
“Kane ka jingthut hapoh ka liengsuin kan long ka mat na ka bynta ka jingtohkit da ka iingbishar ia kaba la thung mardor ban pynlong ia ka jingtohkit khnang ban lap ia ka daw tynrai halor jong kane ka jingjia,” ong ka tnat shipai.
Kine ki san ngut ki dkhot jong ka tnat shipai ka Indian Army kiba la khlad ha kane ka jinghap liengsuin ha Arunachal ki kynthup ia u Major Mustafa Bohara (27), Major Vikas Bhambu (27), Sepoy Rohitash Kumar (33 snem rta) bad u Craftsman (Engine Technician) u KV Ashwin bad u Havildar Brijesh Sinha kiba dei na Assam.
U Major Mustafa Bohara bad u Major Vikas Bhambu ki dei ki pilot jong kane ka liengsuin helicopter.
