Imphal, Nailar 16 : U Myntri Rangbah (CM) ka Manipur, u N. Biren Singh u la ong ba ki pulit ka jylla ki la ioh ban kurup ia shibun bah u drok ki ba la kot sha ka T. 4,040 klur bad ioh kem haduh 2,536 ngut ki briew bad rejistar 1,930 tylli ki case naduh kine ki khyndiat snem ba la lah.
U CM Singh u la ong ki ba bun bah ki kynhun seng bhalang bad ki nongshong shnong ki la ai ka jingkyrshan ka ba pura ha ka thma pyrshah drok ha ka jylla, bad na ka liang ka sorkar ruh ka la thaw ia ka kynhun Anti Narcotics Task Force ba kyrpang ban tehlakam ha ka ba iadei bad ka jingkynrei jong u drok ha ka jylla.
“Kito ki ba rep kynja (marijuana), kin ioh da kiwei pat ki lad jingiarap shi bynta jong kane ka thma drok ka ba dang iaid shakhmat.” Na ka liang ka sorkar ka la pynkhreh ia ka kaiphot ka ba bniah (Detailed Project Report) ha ryngkat ki lad jingiarap na ka Union Development jong ka North Eastern Region & Agriculture Ministries,” u la ong.
Ha ba pynher ia la lama jong ka ri ha ka jingrakhe ia ka sngi laitluid jong ka ri (Independence Day) hynnin ka sngi Nyngkong ha First Manipur Rifle Ground ha ki bynta ba pajih na Imphal, u CM Biren Singh u la ong da ka ba pynsngap ia ka jingkyrpad jong ka sorkar, haduh 26 ngut ki dkhot jong ki kynhun seng lehnoh ki la wan ban pyndem ia lade mynta ka snem.
Nalor kata u la ong ruh, khnang ban tehlakam ia ki kam bam sap la nang pynkhlain shuh shuh ia ka tnat Anti-Corruption Cell hapoh ka ophis jong u Myntri Rangbah ia ka ba la khlieh da u ophisar IAS u ba ha ka kyrdan Secretary.
