Shillong, Nailar 12 : Ka jingialehkai kaba long ha kane ka janmiet ka la thaw rekod ha ka Shillong Premier League namar kadei ka jingiakhun kaba nyngkong ba kano kano ka kynhun kanioh ban thep haduh shiteng dorjon lane 6 kol bad ruh kadei ka jingiakhun kaba nyngkong ba uno uno u rangialehkai un ioh ban thep hat-trick.
Kane ka dei ha ka jingiakhun hapdeng ka Mawlai SC bad ka Malki hadien ba ka Mawlai ka la ioh ban thep haduh 6-1 kol ha kaba u Manbha Iawpyniaw tang marwei hi u la ioh ban thep haduh lai kol ha ka jingialehkai kaba long ha madan Third Ground, Polo.
Ym tang katta kadei ruh ka jingiakhun kaba nyngkong ba ka Mawlai ruh kan shah thep kol ha katei ka lympung jong ka Shillong Premier Leagueha ki phra sien iakhun.
Ki kol ba ka Mawlai ka iohthep ha kane ka sngi ki kynthup ha ka minit kaba 24, kaba 58 bad kaba 74 ba la ioh ban thep da u Manbha, katba ia kiwei pat ki kol la ioh ban thep da u Nikelson Bina ha ka minit kaba 26,nangta u Samuel Lyngdoh Kynshi ha ka minit kaba 37 bad u Donlad Diengdoh ha ka minit kaba 40.
Na ka bynta ka Malki pat u Marchterfield Marbaniang u la ioh ban thep ha ka minit kaba 86. Ha ka jingiakhun ha ka kylla kaba nyngkong kaba long ha ka 09tarik Naitung ka Mawlai ka lajop da 4-0 katba ha kane ka sngi kalaioh ban jop haduh 6-1 kol. Haduh mynta ka Mawlai ka la ioh ban don ha ka kyrdan kaba nyngkong hi da ki 22 point katba ka Malki pat da ki saw point bad don ha ka kyrdan kaba ar na shatrai.
Ki bor pyniaid ki la pynbna ruh ba ia mynta shipor kan ym don kano kano ka jingialehkai ha kaSPL tad haduh ka 18tarik, ka sngi ba ki pynbeit ba ka Mawlai kan iakhun pyrshah ia ka Nangkiew hadien ba ka jingiakhun hapdeng kitei ki ar kynhun kaba dei ha ka 4tarik la pynkynriah noh na ka daw jong u slap.
