Guwahati, Risaw 31: Ka sorkar Assam ka don ia ka jingthmu ban tei thymmai haduh 4000 tylli ki skul kiba don ha ka jylla ia kiba yn pyndep ha kine ki shiphew snem ki ban wan khnang ban lah ban pyniaryngkat kyrdan kumba long kito ki skul shimet kiba paka.
Shiphew tylli ki skul bala rim ha Guwahati, kaba kynthup ia ka skul kaba dei naduh ka por jong ki British, ka Cotton Collegiate Higher Secondary School kan ioh ia ka skul kaba thymmai ha ka kylla kaba nyngkong, pynbna u Myntri Rangbah (CM) ka Assam u Himanta Biswa Sarma hynnin ka sngi U Blei, hadien ba ula pynlong ka jingleit jurip ia ki katto katne tylli ki skul ba la rim kaba kynthup ia ka jaka kaba u pule mynshuwa ka Kamrup Academy Higher Secondary School.
U Sarma ula ong ha kaba sdang yn shim ia ki sienjam ban pynkhreh ban tei thymmai shwa ia ki 1,000 tylli ki skul, kata ban pynkylla ia ki sha ki skul jong kane ka juk kaba thymmai naduh ki primary haduh ki kyrdan senior secondary.Ka jingthmu ka long ruh ban pynieng ia ka jingtei ha kawei ka jaka bad ban pynkylla ia kawei pat ka bynta sha ka jaka ialehkai.
“Ka sorkar ka don ia ka jingthmu ban tei kumba phra haduh khyndai tylli ki skul ha kawei pa kawei ka constituency.Ha ka jingpynkhreh kaba nyngkong kumba 1000 tylli ki skul kin ioh ia ki jingtei kiba thymmai lyngba ka mangtyngka ka ban kot kumba T.5000 klur,” ong u Sarma uba la bynrap ruh ba ka jingtei ia kine ki 1000 tylli ki skul yn pyndep kat haduh u snem 2026.Ha ka kylla kaba bud yn bteng ia kane ka jingtei sa na ka bynta ki palat 2000 tylli ki skul.
“Na ka liang ka sorkar kala dep lypa ban pynkhreh ha kaba iadei bad ka jingtei ia ki 1000 tylli ki high school bad higher secondary school,” ong u Sarma lyngba ki lad pathai khubor.Nalor kata ula ong ruh ba kino kino ki jaka pule puthi kiba don ia ki jingtei kiba la kynjoh palat ia ka 100 snem na ka liang ka sorkar kan iarap ban pynneh pynsah ia ki kum ki jingtei sahkynmaw.
U CM Sarma ula pynlong ruh ka jingleit jurip ia ka Sonaram Higher Secondary School ha Bharalumukh, ka TC Girls’ HS School bad ka Gopal Boro Government HS School.
Ha kajuh ka por u Sarma ula kyntu ruh ia ka tnat PWD ba kan pynkhreh ia ka kaiphot kaba bniah na ka bynta ka jingtei ia kine ki skul, kata da kaba phaikhmat halor ka jingpynioh ia ka jaka ialehkai kaba heh nalor ki kamram klas kiba katkum kane ka juk kaba mynta.
Shuh shuh lyngba ka Twitter u Sarma ula ong ruh ba ula pynlong ka jingleit jurip ia ka Kamrup Academy, Guwahati bad bishar bniah ha kaba iadei bad ki jingtei.Ula ong ba ia kane ka skul la sdang naduh ka snem 1930 bad ba u sngew sarong ban ioh pule ha kane ka skul kum u khynnah. “Ia kane ka skul yn tei thymmai bad kan ioh ruh ia ka auditorum kaba thymmai,” ong shuh shuh u Sarma.
