Shillong, Jylliew 18 : Ka jingther u lapbah ha kylleng ki bynta jong ka jylla ha kine ki ar bnai tam ka la pynjot thiaw ia bun tylli ki longiing, ka jingkhyllem bun ki dieng ki siej, ka jingduh ki jaka puta bad shim ruh bun tylli ki mynsiem briew. Ka jingther u slap mynta ka kynti ka la long shaba palat bad tam lut wat ia ki snem ba la dep.
Tad haduh mynta ki la don haduh kumba 30 tylli ki mynsiem briew kiba la duhei na ka daw ka jingwan lyngshop ki bor ka mariang watla na ka liang ka sorkar ka dang ioh lum tang 24 ngut ki jingduh ki mynsiem briew naduh ka 01tarik Iaiong haduh ka 17tarik u Jylliew 2022.
Na kine, haduh 17ngut kiba khlad ki dei tang ha East Khasi Hills na ka daw ka jingtwa khyndew kaba jia ha Mawkynrew Block, Mawphlang Block bad ruh ha Dangar – Mawsynram Block.
Ha East Khasi Hills
Ha ka ka 17tarik, haduh 9 ngut ki briew ki la duhei ia la ka jong ka jingim ha Mawsynram Block, East Khasi Hills. Na kine, san ngut ki dei na kawei ka iing – kata ka Kyllity Langpen (32snem), Daphisha Langpen (12snem), Daskhemlang Langpen (5snem), Sa I Dawanbiang Langpen (3snem) bad u khunlung ba dang 6 bnai hadien ba ka iing ba ki shong ka la shah taplup na ka jingtwa ka khyndew ha Dangar.
Ha kawei pat ka jingjia ha Mawsynram Block hi, ka heprit Sonali Banai (7snem) ka la khlad noh na ka jingtwa khyndew ha Boro Ryngku katba u Nathan Dejel Sangma (12snem) u la khlad noh na ka jingtwa khyndew ha Betgora.
Ka jingtwa khyndew ha Kenmynsaw kaba dang hap ha Mawsynram Block hi, ka la shim ia ka jingim jong ki shijur, kata ka Drit Byrsaw bad u Robino Kynter.
Dang ha ka 16tarik mynta u bnai, saw ngut ki shipara ki la duhei ia la ka jingim hadien ba ka khyndew kaba twa ka la tap ia ka iing jong ki ha Laitlarem, Mawphlang Block. Kine kiba khlad kidei kiba la tip kyrteng kum I Wanlambiang Kharmyndai (9snem), Banlumlang Kharmyndai (6snem), Ribhalin Kharmyndai (6)snem, bad I Daphilari Kharmyndai (8snem).
Ha ka 13 tarik pat, uwei u briew ba tip kyrteng kum u Sidres Kharsohnoh u la khlad noh na ka jingtwa khyndew ha Mawkynrew Block.
Ha ka 04tarik Iaiong pat, lai ngut ki briew ki la khlad ha Mawkynrew block. Kitei kiba khlad ki kynthup ia ka Larisuk Umsong, Mohit Kshair bad Dilibon Tasang.
Ha Ri-Bhoi
Uwei u briew uba tip kyrteng kum u Pyrkhatbha Shohshang u la khlad bad saw ngut kiwei pat ki la mynsaw na ka jingkhyllem u dieng ha ka auto kaba ki shong ha ka 13tarik u Jymmang ha Panitola.
West Garo Hills
Lai ngut ki briew ki la khlad ha ka 09tarik mynta u bnai na ka jingtwa khyndew ha Jebalgre kab hap ha Gambegre C&RD Block. Kine kiba khlad ki dei kiba la tip kyrteng kum u Pritish Ch. Marak (31snem), Ayanbi Marak (31snem) bad Almost Ch. Marak (12snem).
Ha ka 23tarik Iaiong, u Arian TM Sangma (9snem) u la ngam jyllop ha ka wah Kongbe kaba hap ha Rongram Block.
South Garo Hills
Saw ngut ki briew ki la khlad ha katei ka distrik ha ka 17tarik Jylliew na ka daw ka jingshlei um bad iwei pat na ka daw ka jingtwa khyndew. Kiba khlad kidei kiba la tip kyrteng kum u Tengkam A Sangma (31snem), Gamchia Ch. Sangma (20snem), bad Yangkim Ch. Sangma (4snem). Ka Kasinchi R. Marak ka la khlad noh na ka daw ka jingtwa khyndew ha Siju, South Garo Hills.
Ha kawei pat ka jingjia, uwei u briew ba tip kyrteng kum u Johnchenian R. Marak u la khlad noh ha ka 19tarik Iaiong na ka daw ka jingngam jyllop ha Baghmara block.
South West Garo Hills
Uwei u heprit ba dang 2.5 snem ba tip kyrteng kum u Tanush Hajong u la khlad na ka jingtwa khyndew ha ka 09tarik Jylliew ha Betasing Development Block.
Uwei pat u briew ba tip kyrteng kum u Nangrin Ch. Marak u la khlad ha ka 05tarik Iaiong ha ka eriong kaba la jia ha Rerapara block bad Betasing block.
West Jaintia Hills
Uwei u rangbah ba tip kyrteng kum u Primel Bamon u la khlad noh na ka jingkhyllem u dieng kseh ha PWD South Quarter kaba ha Ladthadlaboh, Jowai ha ka 19tarik u Jymmang.
