Shillong, Naitung 8 : U Executive Member ka tnad Elaka, Bah Jambor War hynne ka sngi u la pyntip ba ki don haduh 29 tylli ki jaka kiba don hapdeng ka jingkajia pud hapdeng ki Sirdarship, ki Elaka bad ki shnong ki thaw hapoh u pud u sam jong ka Khasi Hills Autonomous District Council (KHADC).
Haba jubab halor ka jingkylli ba wanrah da u MDC ka Pynthorumkhrah, Bah PN Syiem, u Bah Jambor u la ong ba na kitei ki 29 tylli, 22 tylli ki dei kiba dang sahteng khlem pat lah ban pynbeit bad hynñiew tylli pat ki dei kiba la dep ban pynbeit da ka Council.
U EM u ong ruh ba ka Council ka la ioh pdiang jan man ka por ki jingujor ia kajia pud, kumta na ka EC ka la dep ban pynkylla noh ia ka Elaka act 2021 kaba ailad ba ka bor synshar ba don tang uwei u briew ban lah pynbeit noh ia kitei ki jingkajia kham kloi.
U la iathuh ruh ba katei ka ka bor synshar ba don tang marwei kaba dei ruh ka appellate authority, kan shim ruh ia ka jingiarap na ka committee kaba lathaw bad khlieh da u CEM bad EM Elaka ban pynbeit ia kum kitei ki jingujor.
“Kiwei pat ki daw kiba pynslem ia kum kitei ki mukotduma ki dei na ka daw ka khlam COVID kumta ka committee kaba kynthup ia u CEM bad EM Elaka ka long ban peit ia kine baroh,” bynrap biang u EM.
Shwa kane, u Bah PN Syiem ula pynpaw ia ka jingsngew bynniaw halor ka jingdon bun ki jingkajia pud kajia sam kiba dang sahteng khlem pat lah bishar ha District Council bad kumta u la kyntu ia ka Dorbar ba kan bthah ia ka EC ba kan don noh ki stad ain ban iarap lang ia katei ka kynhun nongbishar ba marwei khnang ban lah pynbeit noh ia kitei ki mukotduma.
