Kohima, Nailar 22 :Uwei u khynnah Naga 15 snem rta u bym don ia ka bor iohi ha ki khmat ula pynkyndit ia kiba bun balang lyngba ka jinglah ka jong u ban rwai haduh 16 tylli ki jait ktien bapher bapher.
U Ham-e-Konyak, ula pynpaw sha ka pyrthei ba phim dei ban duh jingkyrmen halor kino kino ki jingeh kiba phi iakynduh.Pyrshang kumno ban iakhun pyrshah ia kine ki jingeh la kalong ha kano kano ka rukom.
Ia u Ham-e-Konyak la kha ha ka 21 tarik u Naiwieng 2007 hapoh ka shnong rit Kongan kaba ha Mon district ka Nagaland.Une u khynnah u lah ban rwai ia kiba bun ki jait ktien jong ki trai shnong bapher bapher ka jylla Nagaland bad kiwei pat.
U nang ban rwai ha ka ktien jong ki jaidbynriew Sumi, Yimchunger, Angami, Rengma, English, Assamese, Hindi bad ki jait ktien jong ki jaidbynriew Naga bapher bapher.
U Konyak u don ruh ia ka YouTube channel, ha kaba u ju thep ia ki jingrwai kiba u la rwai ha ki jait ktien bapher bapher da ka jingiarap u para ka kmie jong u. Une u khynnah um shym la ioh satia kano kano ka jinghikai ka ba kyrpang ha ka liang ka put ka tem bad ka rwai ka siaw.
Hynrei, lyngba ka jingkut jingmut bad ka jingtrei shitom, ula lah ban sngewthuh halor ka tem ka put bad pyrshang ban tem ia ka guitar lem bad kiwei pat ki jait jingtem jingput bapher bapher.
“Ha ka por ba nga dang khynnah, ngam dei u ba biang kumba long kiwei pat ki para khynnah. Ngam shym la leit skul. Kumta ym don da kiwei pat ki lad ki lynti lait noh tang ban shu shong ha la iing bad ban sngap ia ki jingtem jingput. Suki suki nga la sngewthuh ia ka jingsngewtynnad ha ka liang ka tem ka put bad ka rwai ka siaw. Ha kine ki sngi ba mynta, i pa jong nga bad i mama ki la iarap ia nga ban wad ia ki jingrwai bathymmai lyngba ka YouTube, bad dei lyngba kane nga la lah ban rwai ia kiba bun bah ki jingrwai bapher bapher,” ong u Konyak lyngba ka lad pathai khubor.
Ha kawei pat ka bynta, na ka liang une u khynnah ula pynpaw ka jingsngew bynniaw halor ka jingbym don ki skul na ka bynta ki khynnah ki bym don ia ka bor iohi ha ki khmat ha ka thain kaba u shong u sah, kaba la pynlong ia u ba un kylla sah biej.
“Nga kwah eh ban leit skul kumba long kiwei pat ki para khynnah. Nga sngewtynnad shibun ha kaba iadei bad ka jingnang ban kren ia ki jait ktien bapher bapher.Nga la lah ban rwai ia jan baroh ki jait ktien bapher bapher jong ki jaidbynriew Naga, kata watla ngam tip ia ki jingmut jong ki kyntien.Nga kwah ruh ban pan map na baroh ki hymmen ki para kynthei bad shynrang lada Nga bakla ha ka ba iadei bad ka rukom kynnoh ia ki kyntien,” ong shuh shuh une u khynnah.
