Nongstoiñ, Jylliew 22: Ka National Commission for Protection of Child Rights (NCPCR) da ka jingïasnohkti lang ka State Commission for Protection of Child Right (SCPCR) bad ka District Administration of West Khasi Hills District, ha ka sngi thohdieng ka la pynlong ïa ka ‘Bal Toskori Se Ajadi 2.0’, kaba dei ka jingïalap kaba la tip kum ka ‘Campaign on Preventing and Combating Child trafficking in 100 bordering and Adjoining District of India’.
Kane ka jingïalang ka dei kum shibynta ban ai jinghikai ha ki shnong ki thaw bad ka imlang sahlang, ba kin tip kumno ban ïada na ka jingshah khaïi jong ki khunlung khynnah kumjuh bad ki samla shynrang bad kynthei.
Ha katei ka jingïalang, u bah JW Sutting SDPO ka Mawshynrut Sub Division, u la long kum u nongbatai ne resource person, ha kaba u la batai ruh bad ong ba kane ka dei ka jingai jinghikai ban ïada na ka jingshah khaïi ki khunlung khynnah.
Pynban kam thew tang kawei ka jingmut hynrei ki don shibun, namar naduh ki khunlung khynnah, ki samla ki rangbah ruh ki ngat ha ki nongkhaïi. Ki don khunlung kiba shah tuh bad shah die sha ki kam awria, don kiba shu sei ïa ki dkhot met, don kiba shah thok ban pynïohkam ïohjam. Hynrei ki don ruh kiba shu shah pynlong mraw pynban ha ki kam sniew bad kiwei kiwei”.
“Haduh mynta ha ka pyrthei baroh kawei ka kam khaïi beaiñ kaba heh tam ka dei ban khaïi ïa u drok. Kaba ar ka dei ka jingkhaïi beaiñ ïa ki tiar siat kum ki suloi bad kiwei kiwei, hynrei ka jingïakhaïi beaiñ ïa u/ka briew ka dei kawei na ki ïew beaiñ, kaba la wan balai ha ka jingkhaïi. Ban ïada ne lait na kine ka shong ha ki bor shnong bor thaw ha ki bor jong ka aiñ bad kiwei kiwei, hynrei kaba kongsan eh ka dei ha ki longïing longsem kiba khlaiñ”, ong la ong.
Ha katei ka sngi la iadonlang ruh u bah H.K.Thabah Mcs Addl DC, u bah Mark A Challam SDO, ki tymmen basan, ki phadar, ki Doctor, ki nonghikai skul, ki nongpynïaid ki jaka sah khunswet, ki nongsynshar shnong bad kiwei kiwei.
