Shillong, Nailar 27: Ka MLA ka NPP na Gambegre ka Dr Mehtab Chandee A Sangma hynne ka sngi Palei, kala ai jingiaroh ia ka CM-IMPACT Programme halor ka jingthaw rekod ka Meghalaya ha ka jinglah ban leh bha ha ka SSLC bad kala ong, ba ka jylla mynta kadei pat ban pynleit jingmut ha ka jingai ia ka jingpule kaba don kyrdan bad ka jingioh ia ki lad ha ki thain nongkyndong.
Haba iashimbynta ha ka Short Duration Discussion halor ka pule puthi ha ka jylla kaba la wanrah da u MLA ka UDP u Bah Paul Lyngdoh, ka Dr Sangma kala ong ba ka jingtuklar ka Sorkar kala pynkylla noh ia ka jinglong jingman ha ka rukom kaba leh sniew ha ki snem kiba la leit noh.
“Ka CM-IMPACT programme kala pyni ia ka resol kaba khraw. Namar ka CM-IMPACT ngi lah ban iohi ba ka percentage jong ka jingpass kala kiew ha ka eksamin SSLC na ka 54.80% sha 97.26% mynta u snem. Ka jingiehnoh shiteng por ia ka jingpule kala hiar kynsan na 17.4% sha ka 6.7%” kala ong.
Hynrei kala maham pat ban pyniaryngkat dor ia ka jingkiew ha ka jingpass bha bad ka jinglah ban leh bha pat ha baroh ki liang.
“Watla katei ka resol kala long kaba ai mynsiem, ngi donkam ruh ban shimkhia ia ka jinglong jingman baroh. Ka rukom ai ia ka jinghikai kaba paka bad ka rukom pyrkhat kaba janai kidei ki bynta kiba hap ban shimkhia bha” kala ong.
Ka Sangma kala pynpaw ia ka jingduna ha ka jingdon ia ki skul HSSLC ha ki thain nongkyndong jong ka jylla Meghalaya bad ka pynpaw ba kiba bun hi ki Higher Secondary School ki don bha ha Shillong bad Tura.
“Ha ka constituency jong nga ka don thik tang kawei ka HSSLC school. Haduh mynta ki khynnah pule ki hap ban pynlut por haduh 2-3 kynta ban leit sha ki jaka pule. Kam shim la don kano kano ka jingbhah kaban biang ia ka rukom don ia ki HSSLC School ha ki District” kala ong bad ka kyntu ia ka tnad pule puthi ban pynlong ia ka jingsorjamin ha man la ki district khnang ba ka jingsam ne jingbhah kan long kaba mar katjuh.
Kala kren ruh ia ka jingdonkam ia ki Agriculture-based Skilling Centres ha ki thain nongkyndong ban plie lad ia ki khynnah pule ki bym lah shuh ban bteng ia ki jingpule ki jongki hadien ba kila pyndep ia ka SSLC.
“Ngi dei ka imlang sahlang kaba shaniah ha ka rep ka riang. Ngi lah don mynta ia la ka jong ka University. Katto katne ki Course bad Curriculum lah ban pynwandur kiban iahap bad ki samla. Ngi donkam ia ki jaka ai jinghikai pyntbit kiba iadei bad ka rep ka riang ha ki thain nongkyndong” kala ong.
“Ki samla pule na kiba bun ki daw ki bym lah ban leit shabar ne kim lah ban bteng shuh shuh ia ki jingpule ki jongki, kidei ban ioh ia ki lad bad kabu ban pule ha ki Vocational Studies kiba la pynwandur na ka bynta ka jongki” kala bynrap.
