Shillong, Iaiong 17: Ka wat baar jong ka jingiakren pynbeit pud hapdeng ka Meghalaya bad Assam ban pynbeit ia ki 6 tylli ki jaka kiba dang sah, kan sa bteng biang hadien ba la kut ka elekshon ha Assam, la ong u President ka Hill State People’s Democratic Party u Bah KP Pangniang hynne ka sngi Thohdieng.
“Dang shen u Myntri Rangbah ula iathuh ia ngi, ba tang shu dep ka elekshon ha Assam kin sa bteng biang ia ka jingiakren pynbeit ia u pud u sam” ong u Bah Pangniang haba iakren bad ki nongthoh khubor.
Ula ong, ba ka seng kala dep ban pynkynmaw ia ka sorkar ha u snem uba la dep ban bteng biang ia ka jingiakren.
“Ha u snem ba la dep, ngi lah phah da ka jingthoh na ka liang jong ka seng sha ka sorkar ban bteng ia ka jingiakren pynbeit pud ha ka wat ka baar bad ka Assam,” ula ong.
U Bah Pangniang ula bynrap ba ka HSPDP kan leit ban iakynduh biang ia u Myntri Rangbah ha kine ki sngi ban wan ban pynbor na ka bynta katei ka jingiakren.
“Ha kine ki khyndiat sngi, ka seng kala rai ban leit iakynduh ia u Myntri Rangbah ban pynpaw ban sdang biang noh ia ka jingiakren pynbeit pud na ka bynta ki 6 tylli ki jaka kiba don hapdeng ka jingiakajia ban iakren pynbeit noh ia u pud u sam uba la sahteng la bun snem bad ka jylla Assam” ula bynrap.
Katkum ka jingong ka jongu, ka jingpynbeit ia u pud u sam ha ki thain khappud bad ka Assam kadei ka mat kaba hakhmat eh jong ka seng bad kan long sa uwei pat u mawmer na ka bynta ka sorkar jylla ban pyniaid shakhmat.
