Tura, Iaiong 17 : U Myntri Rangbah ka Jylla Conrad K Sangma ha ka sngi Thohdieng, ula iakynduh ia ka A’chik Literary Society ha Tura ban iakren halor ka jingpyntreikam ia ka rai jong ka Kynhun Myntri ba ai jingithuh ia ka ktien Khasi bad Garo kum ki Official Language ka Jylla nalor ka ktien English.
Haba niew ia kane ka rai kum ka sienjam ban sah khana ha ka histori ka jylla, u Conrad ula batai ia ka kynhun halor ki jing thmu jong ka Sorkar ban pynrung suki suki ia kine ki artylli ki Ktien ha ka jingpyniaid kam ka Sorkar, ka jingiakren bad phah jingthoh bad kumjuh ruh ha ka jingpynlong ia ki eksam.
U Conrad ula ong ba kane ka rai ka phah ruh ia ka khubor ba khlain sha ki nongshongshnong bad ka Sorkar India halor ka jingkongsan ban kyntiew ia ki ktien lajong, khamtam ha ka jingiadei bad ka jingdawa bala sahteng lah slem bha ban kynthup ia ka ktien Khasi bad Garo ha ka Eighth Schedule ka Riti Synshar ka Ri.
“Ki kam ki jam mynta kila sdang ban iaid. Katba ka jingpyntreikam pura kan shimpor, kane ka pyni ia ka sienjam ba kongsan ban jam shakhmat” ula ong.
U Myntri Rangbah ula pynpaw ruh ba ki jingpyniaid ia ka Iingdorbar Thaw Ain kan sa iohi shen ia ka jingkylla, ha kaba ka jingiakren bad jingiatai ka lah ban long ha ka ktien Khasi bad Garo ha ki Dorbar ban wan hapoh ka Iingdorbar Thaw Ain ba thymmai.
Haba pan ia ka jingkyrshan, u Conrad ula kyntu ia ka A’chik Literary Society ba kan shim ia ka bynta ba kongsan ha kaban thaw ia ki rule bad ki kyndon treikam kiba donkam na ka bynta ban lah pyntreikam bha ia kane ka rai. Ula ban jur baka jingiatreiang bad ki kynhun ba khmih ia ki ktien ki thylliej kan long kaba kongsan bha ha kabna pynthikna ba ka policy kan ai jingmyntoi kumba thmu.
Ka Society kala pdiang ia kane ka rai bad pynskhem ia ka jingkut jingmut ba kin nang pynriewspah ia ka ktien Garo, haba ai jingkular ruh ban kyrshan ha kaban thaw ia ka lynti ban pyndonkam ia ka ha ka rukom kaba thikna.
