Shillong, Jymmang 20 : U Myntri ki kam Jngohkai Bah Paul Lyngdoh ha ka sngi Ba-ar, ula ban jur ia ka jingdonkam ka jingiatreilang bad ka jingiatehlok hapdeng ka Sorkar Jylla, ka KHADC bad ka Hima Mylliem ban wanrah ia ki kam jngohkai na ki jingtei ba don ia ki khana pateng (heritage tourism) bad ki kam jngohkai halor ka kolshor (cultural tourism) kum ki kam ba kongsan jong ka Iewduh-kaba dei ka Iew tynrai kaba rimduh bad ba hehduh hapoh ka thain Shatei Lam Mihngi.
Haba iakren bad ki nongthoh khubor, u Bah Paul ula ong “Ki lad ki lynti ki don bun bah. Kane ka donkam ia ka jingiatreilang, ka jingiatehlok bad ki paralok ba hakhmat eh ki dei ban long ka Sorkar Jylla, ka KHADC bad ka Hima Mylliem. Shisien ba ngi la don ha kajuh ka thong, ngi lah ban phaikhmat ka ki kam jngohkai na ki jingtei ba don ia ki khana pateng bad ki kam jngohkai halor ka kolshor kum ki kam ba kongsan jong ka Iewduh”.
Ula niew ruh ia ka jingleit iuhkjat jong u Myntri Rangbah ka Jylla Conrad K Sangma ha iewduh kum ka sienjam kaba khraw bha ban pyniadei bad ki nongsengkam, ki nongkhaii bad ki nongshong dukan.
“Ngi kmen shibun ba kane kala jia hadien ki phew phew snem ha kaba u Myntri Rangbah ryngkat ka jingsynran ki arngut ki Myntri Sorkar, kila leit dalade ban iuhkjat ha Iewduh bad ioh iakren ia ki jait ba ki jait ki nongkhaii bad nongshongdukan bad ruh ki briew, kiba ioh jingmyntoi na ka Iewduh” ula ong.
Haba pynpaw ba ka Iewduh kum ka iew tynrai kaba hehduh ha ka thain Shatei Lam Mihngi ka donkam ia ka jingpynwan dur thymmai namar bala bun phew snem la shu ieh ia ka, u Bah Paul ula ong “Ngi kem ba hynnin ka sngi ngi la pynbna ba nalor ka T.6 klut ka jingtheh pisa ban pynwan dur thymmai ia ka Iew, ngi la rai ruh ban ai biang ia ka song pisa sa T.15 klur-kaba mut ba baroh ka long T.21 klur ban shna pynbha ia ki nala, ki jingtei, ka bording elektrik, ka um naba bun ki pipe um kila pei- kumta, kane kan iarap bha ha ka ban weng ia ki jingeh ba ki nongkhaii bad ki nongshong dukan ki mad mynta”.
U Bah Paul ula pyntip ruh “Ki la don ruh ki katto katne ki jingbthah bala ai sha ki Tnad ba dei khmih kum ka MeECL ba kan bujli noh mardor ia ki post elektrik, kiba la kem sarang. Ngi khmih lynti ba shisien ba la pynmih ia ka tender, ngi dei ban lah ha kaban pyntreikam ia ka project hapoh ki lai bnai ban wan”.
Haba kylli, u Bah Paul ula ong “Hooid, ka dei kaba phi ong ba ka Iewduh ka hap hapoh ka jingpyniaid jong ka KHADC bad ka dei jong ka Hima Mylliem hynrei ha kane ka kam, naba da ki spah bad hajar ngut ki briew ki rung ki mih bad die ia ki mar jong ki ha Iewduh bad ki don ruh da ki spah ngut ki nongshongdukan bad ki briew ba shong dukan madan, ngim don lynti da kumwei pat hynrei ban iarap lem namar ka iew kala rim bad kala jot”.
“Kane hooid, ka dei ka dak ka jingkwah iarap monsngewbha na ka liang ka Sorkar hynrei ngi khmih lynti ba ka Hima Mylliem bad kumjuh ruh ka KHADC kin leh iala ka jong ka bynta khnang ban nang lah weng shuh shuh ia ka jingjynjar jong ki briew ha Iewduh” ula bynrap.
 bad ki kam jngohkai halor ka kolshor (cultural tourism) kum ki kam ba kongsan jong ka Iewduh-kaba dei ka Iew tynrai kaba rimduh bad ba hehduh hapoh ka thain Shatei Lam Mihngi.){kind=link}