Nongstoiñ, K’lyngkot 14: Uwei pa uwei u briew u don la ka jong ka jong ka sap kaba u Blei nongbuh nongthaw u la ai, la u dei u ba biang ha ki dkhot met ne u ba duna ha ki dkhot met na ki ba bun ki daw, la ka long naduh ba kha ba pun ne ka jingur jinghap ne na kiwei pat ki jingjia ki ba bun jait.
Napdeng kiba bun ki briew kiba ngat ha kine ki jingjia, don kiba pyrshang ban wad їa ka sap ba kyrpang bad ki pyndonkam hok їa katei ka sap ban kyrshan їa la ka їng ka sem bad ka jingim ba man ka sngi.
Uwei napdeng ki rangbah uba la pyndonkam hok їa ka sap ba u Blei u la ai, u dei u bah Koles Masla na Mawhati Ribhoi District, uba la matlah baroh ar tylli ki khmat hynrei, u don pat їa ka sap rwai bad ka sur ka bym da pher than na ka sur u kaitor ba pawnam tam hangne ha ri Khasi bah Skendrowell Syiemlieh (bam kwai ha ïing u Blei).
Ha ka sngi saitjaiñ ka 13 tarik Kyllalyngkot, u bah Koles u la poi ha Nongstoiñ bad ryngkat uwei na kiba ha їing u ba ju synran bad їalam ban btin їa u haba u leit rwai kylleng kylleng. Haba u la rung hapoh їew Nongstoiñ u la pan jaka khyndiat ha kyndong jong kawei ka dukan bad u la sdang ban kynud їa ki sur kiba bang ba syiang, ha kaba ki paitbah nong wan iew wan hat ki la ang lyngngoh bad ki la їa pynnoh їa ki jingai sngewlem ban їarap їa utei u rangbah.
Ka Shlem haba ban їakren bad u, u la ong ba hynñiew snem mynshuwa u la duh noh їa ka bor їohi ha baroh ar tylli ki khmat bad u la pyrshang ban wad lad wad lynti kumno ban kyrshan їa la ka jingim, hynrei um shym lah satia ban lap da kano ka lad un pyrshang.
U la ong ruh ba namar ba u dei u ba sngew tynnad bad ieit bha їa ki jingrwai naduh dang rit, kumta u la pyrshang ban pyrthuh bud їa bun tylli ki jingrwai ban kynud bad ha kaba khatduh u la sngewthuh ba ka jingrwai ka dei ka sap kyrpang kaba u Blei u la ai ha u bad u la sdang ba pyndonkam hok їa katei ka sap ba kyrpang ba u don.
U Bah Koles u iathuh ba u ju leit ban rwai ha ki jaka їew bad ha ki jaka ba kham long sor kylleng ki jaka їew ha Ri Bhoi District, ha Sohra, ha Shillong bad ha kiwei kiwei ki jaka bad haba u leit ban rwai u ju rwai tang їa ki jinrwai niam, ki jingrwai ieit ri bad ki jingrwai kiba ki paitbah ki kham sngew tynnad ban sngap.
U ba haїing u ba ju їalam їa u, u la iathuh ba u Bah Koles nalor ba u matlah u la duh noh їa ka kmie naduh dang rit. U don saw ngut shi para, ar ngut ki shynrang bad ar ngut ki kynthei bad ka jingmat lah jong u, ka dei na ka daw jong ka jingshitom ha kaba nyngkong u dang mat lah tang kawei ka khmat hynrei ka jingpang ka nang ktah suki suki bad u la duh noh їa ka bor їohi na baroh ar tylli ki khmat.
.){kind=link}