Shillong, Kyllalyngkot 14: Ka President jong ka ri India, ka Droupadi Murmu kan wan poi lashai ka Sngi Nyngkong ha Tura ban plie ia ka 5th Meghalaya Games ka ban long ha PA Sangma Stadium, Tura.
Ka President mar ia poi ha Tura kan leit ban plie ia ka Meghalaya Games kaba dei ka lympung iakob ialehkai kaba heh duh hapoh ka jylla Meghalaya ha kaba yn donlang u Myntri Rangbah ka jylla u Conrad K Sangma, u Myntri ka tnad ialehkai Bah Shakliar Wajri bad kiwei kiwei.
Ha ka 16 tarik u Kyllalyngkot, ka President kan ai jingkren ia ki dkhot jong ki Self Help Groups ha Baljek Airport, Tura bad kan buh online ruh ia u mawnongrim jong ka Integrated Administration Complex kaba thymmai ha Tura.
Ha kane kajuh hi ka sngi, ka President kan ai jingkren ha ka jingialang k aban long ha Mawphlang bad kan plie ruh online ia ka surok Rongjeng-Mangsang-Adokgre bad Mairang-Ranigodown -Azra bad kan buh ruh ia u mawnongrim na ka bynta ban tei iaka Shillong Peak Ropeway bad ki jaka sah jong ki nong jngohkai ha ka shnong Kongthong, Mawlyngot bad Kudengrim.
Ha ka janmiet, ka President kan iashim bynta ha ka prokram ba pynlong da ka Sorkar Meghalaya ha Raj Bhavan, Shillong.
Ha ka 17 tarik u Kyllalyngkot, ka President kan iashim bynta ha ka jingrakhe golden jubilee jong ka Karbi Youth Festival ha Taralangso, Diphu, Assam.
