Shillong, Nailar 4: Ka Sorkar Jylla kala pyntip ba ka jingshna ia ka surok ba 102 Km na Borghat-Sonapur, kaba don ha khappud ka India bad Bangladesh ha East Jaintia Hills, kan sa sdang noh haba sdang taiew jong u bnai Nailur. Ka Sorkar Jylla kala pyntip ia kane hakhmat ka Iingkashari kaba la shong bishar ia ka mukotduma Public Interest Litigation (PIL) hynnin ka sngi balang.
Ka Sorkar kala dep ai ia ka letter of acceptance sha u Contractor uba la shah jied ban pyntrei ia kane ka surok. Une u Contractor ula aiti ruh ia ka bank guarantee nalor kiwei kiwei ki jingdonkam.
La pyntip ba ka jingpyntrei ia kane ka surok ba 102 km ka dei ban sdang noh haba sdang taiew jong u Nailur.
Ka Sorkar kala kular ruh ba ka song pisa kala don lypa bad kan nym don satia kano kano ka jingdkhoh ha kaban lah pyndep kloi noh ia kane ka surok hadien bala sdang pyntrei ia ka.
Namar kane, ka Iingkashari kala bthah ia ka Sorkar ban file hapoh ka hynriew taiew ia ka report halor ka jingiaid ka kam, ka ban batai ia ka por ban pyndep ia ka jingtrei bad lada long, ban pyni ia ki bynta bala iaid ka jingtrei.
Ia kane ka PIL la mudui da u Bah Kynjaimon Amse hadien ka jingud jingam jong ki nongshongshnong ki saw tylli ki Shnong- – Hingaria, Huroi, Lahalein and Lejri – kiba don ia ki nongshongshnong ba palat 5000 ngut, namar ka jingbym don surok satia ban pyniasoh ia ka thain.
Ka Iingkashari kala buh ban shong bishar biang ia kane ka kam ha ka 16 tarik u Nailur.
