Shillong, Jymmang 17: Ka Shillong Medical College ka lah ban sdang treikam noh naduh u Nailar 2025 bad ka Tura Medical College haph 2026-27.
Ia kane la pyntip da ka Myntri ka Koit ka Khiah Kong Ampareen Lyngdoh hadien ka jingiashimbynta ha ka jingialang bishar kam bala pyniaid da u Myntri Rangbah ka Jylla Conrad K Sangma halor ka jingpyntreikam noh ia ki Medical College hapoh ka Jylla, kaba long hynne ka sngi Thohdieng.
Ka Kong Ampareen shen kan sa leit sha Uttar Pradesh ban peit bniah ia ka model ha kaba ka Sorkar India kala iarap ia ka Sorkar Jyllahangtei ban buh ia hynriew tylli ki Medical College.
Haba iakren bad ki nongthoh khubor, ka Myntri kala ong “Ngi la iashong jingialang bishar kam jong ka Tura Medical College. Ngi khmih lynti ban lah pyntreikam noh naduh u 2026-27. Ngi dang bun ki jingtei ba dang hap ban leh namar ki dei kiba donkam bha”.
Hynrei haba phai sha ka Shillong Medical College, ka Myntri kala ong “Ngi la jam shakhmat bad ki kam kiba iaid shaid shaid. Lada ki kam ki iaid beit, ka Shillong Medical College kan sa sdang treikam noh naduh u Nailar 2025”.
Kala pyntip ruh ba ki don shibun kiwei ki kam kiba hap ban pyndep sted bha ba kynthup ia ka building ban sah ki nonghikai, ban khmih ia ki service rules, pynkylla ia ka service rule ki doktor bad kiwei kiwei.
Ka Myntri ka pyntip ba ka NMC kan hap ban wan jurip bad khmih bniah haba iadei bad ka Medical College ha Shillong hashuwa ban lah pyntreikam ia ka.
