Guwahati, Jylliew 24: Ka Radisson Blu hotel ka ba don ha ka surok National Highway 37 ha Gotanagar, Guwahati ka la kylla long ka phang pdeng naduh ba ki MLA ialeh pyrshah ka Shiv Sena hapoh ka jingialam jong u Eknath Shinde ki la wan sah ha kane ka jaka.
Kine ki MLA ba la ialam da u Shinde ha ka ba nyngkong ki la don hapoh ka hotel ha Surat, Gujarat ha kane ka jan miet sngi Nyngkong ba la lah hadien ba ki wan poi da ka liengsuin ha Guwahati ha ka step sngi Balang ba la lah.
Hadien ba ki la wan poi hapoh Lokapriya Gopinath Bordoloi International Airport ha Guwahati, ia kine ki MLA la ialam noh shapoh Radisson Blu hotel lyngba ki laitylli ki bus ba kyrpang jong ka Assam State Transport Corporation ha ryngkat ka jingsynran lang da ki pulit.
Katkum ki khubor la iathuh ba baroh ki don 70 tylli ki kamra ba la wai na ka bynta hynniew sngi kynthih ha ka dor T.56 lak. Nalor kane ka kynthup ruh ia ki jingpynlut ki ba man ka sngi na ka bynta ka bam bad kiwei pat ki jingdonkam ka ba kot T.8 lak, kata ka ba long 56 lak na ka bynta hynniew sngi, bad ka ba la kot baroh sha ka T. 1.12 klur.
Nalor kata ki jinglut jingsep ki kynthup ruh ha ka ba iadei bad ka jingwan da ka liengsuin ba kyrpang nalor kiwei pat ki jinglut ki ba iadei bad ka leit ka wan bad kiwei pat, ong ka lad pathai khubor.
Ha ka jingpyni bor, u Shinde ha ka sngi Palei ba la lah u la pyllait ia ki dur bad video ha ryngkat ki 41 ngut ki MLA na katei ka hotel, ka jingleh ka ba la nang buh jingeh na ka bynta u Myntri Rangbah ka Maharashtra u ba dei ruh u khliehduh ka Sena u Uddhav Thackeray.
