Guwahati, Jylliew 24: Baroh ki phra tylli ki jylla ka thain shatei lammihngi (Northeast) jong ka ri kin sakhi halor ka jingkiew jong ka jingshit ha ka mariang bad ka jingjur slap ha kine ki laiphew snem ki ban wan (2021–2050) ha ba ia nujor ba ki snem (1990–2019), ong ka kaiphot na ka tnat wad bniah ba dang shen.
Kane ka kaiphot ba la ai kyrteng ‘District-Level Changes in Climate: Historical Climate and Climate Change Projections for the North-Eastern States of India’, la pyllait da ka Center for Study of Science, Technology and Policy (CSTEP), ha ka ba ka la batai lypa ha ka ba iadei bad ki jingkylla ha ka jinglong ka suin bneng bad ha ka ba iadei bad ka jinghap slap hapoh ka jylla Arunachal Pradesh, Assam, Manipur, Meghalaya, Mizoram, Nagaland, Sikkim, bad Tripura haduh kine ki 30 snem ki ban wan.
Ka CSTEP ka dei ka kynhun wad bniah napoh Bengaluru ka ba la pynlong ka jingpule bniah ha ka ba iadei bad ka jinglong jingman jong ka suin bneng ha kane ka thain Northeast jong ka India.
Katkum kane ka jingwad bniah la ong ba ka jingshit ha ka mariang bad ka jingjur slap ka la nangkiew, bad ka jingioh slap ka la long lypa ka ba jur ha baroh ki bynta jong ka thain Northeast ha kine ki arphew snem ki ba la dep, kata naduh ka snem 990 haduh u 2019.
