Shillong, Jylliew 6: U Myntri Rangbah ka Jylla Conrad K Sangma hynne ka sngi Ba-ar, ula sam ia ki cheque sha ki Nongialam Shnong bad ki riew shimet ka Ri-lum Khasi, Jaintia bad Ri-Bhoi District kaba dei jong ka skhim Payment for Ecosystem Services (PES) kaba hap hapoh ka Green Meghalaya Mission.
Ka Payment for Ecosystem Services (PES) ka dei ka skhim kaba iarap song pisa sha ki Shnong ki thaw, ki Kur bad ki riew shimet kiba mih ban pynneh pynsah bad pynrben ia ki khlaw ki btap kiba don ha Jylla Meghalaya.
Ia kine ki cheque la sam kum shibynta jong ka jingrakhe World Environment Day, 2023 hapoh ka Jylla.
U Myntri Rangbah ka Jylla ula iashimbynta ruh ha ka jingrakhe ia kane ka sngi pynneh mariang hapoh Nongbah Shillong ha ryngkat bad ki smala pule, ki Dorbar Shnong bad ki kynhun bapher bapher.
U Conrad haba kynthoh hapoh ka Twitter ula ong “ Ka thong jong ka jingiada bad sumar ia ka mei mariang jong ngi ka iaid tawiar bad ka jingpyrshang jong baroh ki riew shimet ha ka ban wanrah ia ka jingkylla. Ka Meghalaya kala sakhi ia ka jingkhih paidbah bala iasnohkti lang da ki Shnong ki Thaw ban leh eiei ha ki kyrdan bapher bapher ha kaban wanrah biang ia ka jingitynnad bad jingkhuid jong ka Jylla jong ngi”.
Distributed cheques to community leaders & individuals of Khasi, Jaiñtia & Ri Bhoi Districts under #GreenMeghalaya or the Payment for Ecosystem Services (PES) Scheme. PES is a one of a kind scheme which provisions financial support to villages, communities, clans & individuals… pic.twitter.com/3LWsEYwUG0
— Conrad K Sangma (@SangmaConrad) June 6, 2023
U Myntri Rangbah ula ong ba ka Sorkar kala shim ia ki sienjam ha kaban pynneh pynsah bad sumar ia ka mei mariang da ka jingwanrah ia ki prokram kum ka Save Shillong Rivers Campaign, Payment for Ecosystem Services, Rejuvenation of Rivers, Seed Ball bad ka jingiathung symbai dieng. Ia kine ki prokram la pyntrei ha ryngkat ka jingiatreilang bad ki Shnong ki thaw.
Ula pyntip ba ka Sorkar Jylla ha ka sngi Ba-ar kala ai khusnam ia ki Dorbar Shnong, ki Kynhun trei mon sngewbha kiba iashimbynta ha ka jingpynkhuid ia ki wah bad pynneh ia ka jingkhuid jingsuba.
