Shillong, Nailur 20 : Ka Congress kaba don ha ka Liang Pyrshah ha ka sngi Palei, kala pynthikna ba kan nym iatreilang satia bad kino kino ki seng sain pyrthei ha ka elekshon shiteng samoi jong ka Gambegre constituency.
“Ha kane ka elekshon, ngin buh iala u/ka kyrtong lajong. Ka TMC, NPP, BJP ki lah ban don iala ki jong ki kyrtong hynrei ngi ruh ngim buh la ka jong ki kyrtong” ong u President ka MPCC Bah Vincent H Pala haba iakren bad ki nongthoh khubor.
Halor ka jingbatai lypa ka NPP ba ka Congress kan nym ioh bat shuh ia ka shuki MLA ka Gambegre, u Bah Pala ula ong “…Ka elekshon ka dei ka ban dang pynbna. Kumba ju long, ha ka elekshon shiteng samoi, ki ju pyndonkam ia ki nongtrei Sorkar, ka jingpyndonkam bakla ia ka bor ka don beit bad kane ka dei ka dak ba ki long kiba la khreh ban pyndonkam bakla ia ka bor bad kila dep leh ruh ia kata”.
Ka Congress bad ka BJP kin dang ban pynbna ia ki kyrtong jong ki ha kane ka elekshon shiteng samoi katba ka NPP kala dep pynbna ban pynieng ia ka kurim u Myntri Rangbah bad ka TMC kala mynjur ia ka kyrteng ka MDC ka GHADC kaba dei ruh ka kurim u MLA barim ka Rangsakona, ban iakhun ia kane ka elekshoh shiteng samoi.
Ia kane ka elekshon la pynlong hadien ka jingiehnoh kam jong u MLA ka Congress Saleng A Sangma hadien ba ula shah jied ban long u MP ka Lok Sabha na Tura ha ka elekshon ba dang shu dep.
