Shillong, Jylliew 14 : U Myntri ka Tnad PHE Marcuise N Marak ha ka sngi Saitjain ula buh ia u mawnongrim ban pyntrei ia ka Lumshngain, Rynjah Water Supply Scheme ba T.6.72 klur, haba pyntip ba ia kane ka project la mang pisa dang shen hadien ka jingbuddien jong u MLA ka Nongthymmai Bah Charles Pyngrope bad MLA barim Bah Pyniaid Sing Syiem.
“Ka um ka dei ka jingim. Ka Jal Jeevan Mission, bala pyntreikam ha u 2019, ka pyni ia ka jingkut jingmut jong ka Sorkar ban pynioh ia ka umbam umdih sha man ki nongshongshnong” ong u Marak.
Ula pynpaw ba ka jingpynpoi kor um sha ki longiing ha Nongkyndong kala kiew na ka 4550 tylli ki iing kaba long 0.70% ha u 2019 sha ka 5.46 lak ki longiing, kaba long 84% mynta, “hapoh ka jingialam jong u Myntri Rangbah ka Jylla Conrad K Sangma”.
Haba aiburom ia ka jingkyrshan u Myntri Rangbah, ula ong “Kane ka project kala urlong tang lyngba ka jingialam u Conrad K Sangma, uba la lehbun bad buh ia u paidbah hakhmat eh ha ka jingtreikam jong u. Wat lada dei ka jingdawa u MLA, MLA barim, Rangbah Shnong bad ka Shnong ka thaw, ka project ka lah ban nym ioh ia ka jingmang pisa khlem ka jingmynjur jong u”.
U Marak ula kren halor ki project sam um ba kongsan ha Shillong : Ka New Shillong Water Supply Scheme, kaba shong dor T.500 klur, kaba la pyntrei shaid shaid mynta ban pynbiang umbam umsih sha ki 32 tylli ki shnong.
Ka Tnad ka dang pynkhreh mynta ia ka DPR ba thymmai na ka bynta ka skhim Wah Rikyntem ban pynkhlain ia ka jingsam um sha Nongthymmai, Laitumkhrah bad ki shnong kiba marjan.
Halor ka Greater Shillong Water Supply Scheme, ula ong ba ka Pump ba 8 MLD sha ka Mawphlang Treatment Plant kala sdang treikam ha u snem bala lah.
“Ngi la weng ia ki jingeh. Ka project ka dei ban dep noh hapoh u Lber 2027 bad kan pynduna ia ka jingduna um ka sor” ula ong.
Ha ka jingkren, u President ka TMC bad MLA ka Nongthymmai Bah Charles Pyngropt ula ai jingiaroh ia u Myntri ka PHE namar ka jingpynsted ia ki project sam ym bad pynbna ia ka song pisa ba T. 5 lak na ka skhim SRWP jong u ban tei ia ka Iingdorbar Shnong ha Rynjah.
U Bah Charles ula khot ia u Marcuise kum u “Paralok bala slem bha bad u Para” naduh ki sngi ba u long kum u Lamphang ka Iingdorbar bad kum u nongshongshnong ka Pohkseh.
