Shillong, Iaiong 18 : Napdeng ki 543 tylli ki parliamentary constituency, 102 tylli kin leit sha ka jingiathep vote ha ka 19 tarik Iaiong. Ki phra tylli ki Jylla ka thain Shatei Lam Mihngi ki don 25 seat hynrei tang 16 seat kin leit sha ka jingiathep vote lashai ka sngi.
Napdeng ki 14 tylli ki seat ha Assam, tang san seat kin iathep vote lashai ka sngi bad kine ki dei ka Dibrugarh, Jorhat, Kaziranga, Lakhimpur, bad Sonitpur, lem bad ki artylli ki seat Arunachal Pradesh, Manipur, Meghalaya, Tripura, bad kawei ka seat ka Mizoram, Nagaland bad Tripura.
Ha kane ka Phase-I jong ka jingiathep vote, ki kyrtong ba pawkhmat kiba aireng ki kynthup ia u Myntri ka Sorkar Pdeng Sarbananda Sonowal uba iakhun na Dibrugrah, u Deputy Leader ka Liang Pyrshah ha Lok Sabha Gaurav Gagoi uba la pyn ieng da ka congress na Jorhat.
U Myntri Rangbah barim bad MP ka Rajya Sabha Biplap Deb ula iakhun na Tripura West Lok Sabha Seat.
Ha Meghalaya, ka Myntri Khynnah barim ka Sorkar Pdeng Agatha K Sangma bad Myntri Khynnah barim ka Sorkar Pdeng Bah Vincent H Pala kynthup ka Myntri ka Koit ka Khiah ka Jylla Dr Ampareen Lyngdoh, ki dei ki kyrtong ba pawkhmat jong ka Jylla.
Ki don haduh khatsan ngut ki kyrtong crorepati ha Assam bad kaba riewspah tam ka dei ka kyrtong shimet ba aireng na Kaziranga seat ka Diluwara Begum.
U MP ka Shillong ba mynta Bah Vincent H Pala u dei uwei na ki MP ba riewspah tam hapoh ka Ri. U don ia ka nongkynti kaba kot ia palat T.125 klur.
