Shillong, Risaw 06 : U Myntri Rangbah ka Jylla Conrad K Sangma ha ka sngi Ba-ar ula khein kamkai ia ki khubor hamsaia ba ka NPP kan weng noh ia ka BJP na ka MDA bad ba ka BJP ka pyrshang ban pyntroin ia ka NPP ban thaw la ka jong ka Sorkar, haba pynshai ba kam shym la don ruh ka jingiakren ban ai shuki myntri ia ki 8 ngut ki MLA kiba leit iasoh dang shen sha ka BJP.
Haba niew ia kine ki artylli ki khubor hamsaia kum ki khubor ki bym dei bad ba lamler, u Conrad ula ong ba ka NPP, watla ka don haduh 33 ngut ki MLA, kam shym la weng iala ki jong ki paralok ha ka jingbujli Myntri ba khatduh jong ka.
“Ka NPP kala ioh ia ka jingbunpaid duh da 33 ngut ki MLA bad lada ka kwah kan jin da weng lut ia baroh ki paralok ha ka jingbujli shuki myntri ba khatduh. Hynrei kum ka kynhun synrop bad wat kum ka seng sain pyrthei ngi la kren shai halor ki nongrim ba ngi la tei ia kane ka kynhun synrip bad kawei na kine ki nongrim ka long ban pynthikna ba ngin iatreilang” ula ong.
“U nombor u lah ban kylla hangne bad hangtai. Ka jingiadon bynta ha ka kynhun Myntri ka lah ban hiar bad kiew, hynrei ka mynsiem jong ka jingiatreilang ka don bad kam mut ba tang ba ngi la don bun u nombor ngi lah ban klet noh iala ki paralok, kane kam ka lynti ba ngi iapynbeit ha ka sain pyrthei” ula bynrap.
Haba pynpaw ba ki paralok ka kynhun synrop kila aiti lut ialade sha ka MDA, ula ong “Nga la ju kren sha ki nongialam jong ki seng sain pyrthei jong baroh ki paralok ha ka kynhun synrop bad d baroh kila mynjur bad aiti lut ialade sha ka kynhun synrop. Hynrei hooid, kila pynpaw ia ki jingeh haki kam pohiing haba phai sha ki seng jong ki kaba lam sah ka jingkhih jong ki katto katne ki MLA na kawei ka paralok ba iatreilang sha kawei pat”.
Halor ka jingbujli Myntri bad la ka Sorkar ka thmu ban ai shuki Myntri ia ki MLA ba leit iasoh BJP dang shen, u Conrad ula ong “Kam shym la don ka jingiakren halor kane ka bynta bad kam don ruh kano kano ka jingthmu ban pynrung Myntri ia kino kino na kine ki 8 ngut ki MLA kiba leit iasoh dang shen sha ka BJP”.
Ula pynpaw ruh ba ka jingleit iasoh ki 8 ngut ki MLA ka UDP sha ka BJP kam shym la pyni ia kano kano ka dak jingeh ha ka sain pyrthei khleh khaw lang.
“Lada kine ki MLA ki kynthoh sha kano kano ka seng sain pyrthei kaba don shabar ka kynhun synrop bad iasoh sha ka Liang Pyrshah, hooid ki lah ban mutdur ba ka don kano kano ka jingbym shaniah lane kano kano ka jingeh ha ka kynhun synrop hynrei ka jingkynthih ka jia na kawei ka paralok sha kawei pat. Kumta, ka jingkylli ba ym don shuh ka jingshaniah kam mih satia” ula ong haba kyntait ban kynthoh ia ki kam pohiing jong kiwei pat ki seng sain pyrthei.
