Shillong, Nohprah 09: Ki Arngut ki MLA ka Congress ba shah sospon napdeng ki 5 ngut, ki lah ban wan pyniasoh noh sha ka National People’s Party (NPP) ha kane ka taiew ban wan.
Kat kum ka khubor ba ioh, kine ki arngut ki dei I MLA ka East Shillong Kong Ampareen Lyngdoh bad MLA ka West Shillong Bah Mohendro Rapsang. La ong ba kine ki arngut kin wan pyniasoh ha ka 14 tarik mynta u bnai.
Lah ban kdew ki 5 ngut ki MLA ka Congress ba shah sospon ki kynthup ia i kong Ampareen Lyngdoh (East Shillong), bah P.T Sawkmie (Mawlai), bah Mayralborn Syiem (Nongpoh), bah Kimfa Marbaniang (Rambrai-Jyrngam) bad u bah Mohendro Rapsang (West Shillong).
Kane ka jingsospon kala wan jia hadien ba kine ki 5 ngut ki MLA kila leit ban ai jingkyrshan iaka sorkar synroplang ka Meghalaya Democratic Alliance (MDA) ba ialam daka National People’s Party bala kyrshan da ka Bharatiya Janata Party (BJP).
U bah Mohendro Rapsang hynnin ka sngi u la pynthikna ba haka taiew ban wan un sa leit pynïasoh noh bad ka National People’s Party (NPP) naka bynta ban pynthikna ialade ba un dei u kyrtong ka NPP ban iakhun iaka ilekshon 2023 na West Shillong konstitwensi.
U bah Rapsang u la ong haduh mynta u dang dei hi u MLA ka Congress hynrei ha ka ilekshon 2023 um treh shuh ban ïa khun na ka seng Congress bad un ieh noh na kane ka seng ban pynïasoh ialade bad ka NPP.
“Ki mat ba hakhmat eh ba ngan ieng iakhun iaka ilekshon 2023, ki kynthup ka roi ka par jong ki nong shong shnong bad ki shnong ki thaw nalor kiwei de ki mat” la ong u bah Mohendro.
