Shillong, Nohprah 01 : U Nongialam ka AITC bad Liang Pyrshah Dr Mukul Sangma hynne ka sngi palei, ula pynpaw ia ka jingsngewskhem ba ka AITC kan khur ia ka jingjop na man ki Constituency ba ka pynieng kyrtong ha ka elekshon MLA-2023 ha Jylla.
“Kat shaba ngi leit (ban pynieng kyrtong) sngewbha kynman ba ngin jop na kine ki constituency” ong u Dr Mukul haba iakren bad ki nongthoh khubor.
Hynrei kane ka Party haduh mynta kam pat pynpaw satia ia ka jingdon ki kyrtong ba kan pynieng ha kane ka elekshon ban wan ha Jylla.
U MLA ka AITC na Mawsynram Bah Himalaya M Shangpliang u dei uwei na ki laingut ki MLA, kiba la iehnoh iaka jinglong dkhot ka Meghalaya Legislative Assembly bad ba lah ban leit iasoh bad ka BJP.
Haba pynpaw ia ka jingbym sngewpher ia kane ka jingjia, u Dr Mukul ula ong “Ngim shym la jer kyrteng hynrei ngi mano ki ban mih shano- kine ki dei kiba la antad lypa ha ka kam sain pyrthei ba kan jia. Ngi tip, ta ka daw ngi la don lypa ia ki buit treikam”.
U Dr Mukul ula pynpaw ba ka AITC kala don lypa ia ka jingsngew ba ar ne lai ngut na ki MLA ki lah ban mih ym tang na ka TMC hynrei na kiwei ruh ki party.
U Dr Mukul ula bynrap ba baroh ki MLA ba mynta ki lah ban nym dei ki kyrtong jong ka AITC ki ban jop ia ka elekshon.
“Ngi la kren shai ba baroh ki MLA ba mynta kin hap ban iakhun tyngeh ban shah jied biang…kane ka dei ka jingshisha. Katno ngut na ki MLA kiba shah jied biang ha u 2018 bad ruh ha u 2013” ula ong.
Ha kajuh ka por, u Dr Mukul ula ong ba tang ka AITC mynta ka dei ka lynti ba ki paidbah ki kwah ban ioh ha u 2023.
