Aizawl, Naiwieng 05: Ka jingialap elekshon na ka bynta ka elekshon MLA ha Mizoram ban long la 7 tarik Naiwieng, kala kut noh hynne ka janmiet sngi U Blei.
Watla ka jingialap elekshon kala kut hynne, ka sngi Saitjain kaba dei ka sngi khatduh, kala thnem da ki jingialap elekshon kaba jur bha khamtam ba bun ki briew ki dei kiba leit Jingiaseng ha ka Sngi U Blei.
Haduh 174 ngut ki kyrtong ba kynthup ia 18 ngut ki Kynthei, kila mih aireng ha kane ka elekshon, ki ban ap mynta sa ia ka rai u paidbah, ia kaban sa pynbna paidbah ha ka 3 tarik u Nohprah.
Haduh 8,57,063 ngut ki nongthep vote kynthup ia 4,39,026 ngut kin ai ka rai ha ka 7 tarik Naiwieng.
Kat kum ka khana samari u snem 2011, haduh 87% na ki nongshongshnong ka Mizoram ki dei ki paid Khristan.
Ki bor pyniaid elekshon ki pyntip ba ki bor pahara ba kynthup ia ka Central Armed Police Force (CAPF) bad ki Pulit ka Jylla ryngkat ki hajar ngut ki Nongpyniaid ia ka jingthep vote kila poi mynta sha ka 1276 tylli ki Polling Station jong baroh 40 tylli ki Constituency ka Jylla.
Ka Mizo National Front (MNF) ba synsahr ia ka Jylla, ka Zoram People’s Movement (ZPM) ba don ha ka liang Pyrshah bad ka Congress, kila pynieng mar 40 ngut ki kyrtong katba ka Aam Aadmi Party kala iakhun na 27 tylli ki Constituency.
Na ki 11 tylli ki District ka Mizoram, haduh 55 ngut ki kyrtong kila iakhun ha ki 12 tylli ki constituency jong ka Aizawl District katba tang 3 ngut ne ba duna duh, kila iakhun ia ka seat jong ka Hnahthial District.
Ha ka elekshon , palat 8o% ki nongthep vote ki ju iamih ban thep vote. Ha ka elekshon 2013, haduh 80.82% kila mih n aka 6,90,860 ngut katba ha ka elekshon 2018, haduh 80.03% kila mih n aka 7,74,757 ngut.
