Aizawl, Risaw 17: Ki seng sain pyrthei ka Mizoram kila dawa jur ia ka Election Commission of India (ECI) ba kan pynkylla noh ia ka tarik ban niew vote jong ka elekshon Assembly ha Mizoram kaba la buh ban long ha ka 3 tarik Nohprah.
Ka Mizoram kaba don 40 ngut ki Dkhot hapoh ka Iingdorbar Thaw Ain ka Jylla, kan leit sha ka elekshon jied nongmihkhmat ba thymmai ha ka 7 tarik u Naiwieng.
U Vice President ka People’s Conference Lalrinmawii Fanai ha ka shithi sha u Chief Election Commissioner Rajiv Kumar bala phah ha ka sngi Nyngkong ula ong ba ka jingbuh prokram jong ka Sorkar ha ki sngi kyrpang jong ki paid Khristan kum ka Khristmas, Good Friday bad Sngi U Blei ka dei kaba la jia man ka por ha kine ki khyndiat snem bala leit.
“Lada ka ECI kam pynkylla noh ia ka tarik niew vote, kane kan sa ktah bha ia ka jingsngew jong ki paid Khristan kiba la dep mad lypa ia ki jingshah tynjuh kiba bun ha ka jinglehniam jong ki hapoh ka Ri India. Kiba bun kila buh jingkylla la kane ka dei ka jingleh khnang ban nym burom ruh ia ki Khristan ym tang ha Manipur hynrei ha Ri India baroh kawei” kala ong.
Baroh ki seng sain pyrthei ba kynthup ia ka Liang Synshar ka Mizo National Front (MNF), Congress, BJP, Zoram People’s Movement (ZPM) bad ki kynhun Sengbhalang kum ka Young Mizo Association (YMA), kila dep dawa teng ia ka ECI ban pynkylla noh ia ka sngi niew vote (3 tarik Nohphrah) kaba dei ka sngi U Blei, ka sngi ba kyntang jong ki Khristan.
Kumjuh ruh ka synjuk jong ki Balang ha Mizoram ka Mizoram Kohhran Hruaitute Committee (MKHC), kala ai jingthoh ruh sha ka ECI ba kyrpad ban pynkylla noh ia ka tarik niew vote.
Ka ECI kala pynbna ha ka 9 tarik Risaw ban pynlong noh ia ka elekshon ha ki san tylli ki Jylla ka Ri ba kynthup ia ka Mizoram, Madhya Pradesh, Rajasthan, Telangana bad Chhattisgarh.
Ka sngi ba khatduh ban thep kyrteng ka dei ha ka 20 tarik Risaw, ka jingbishar kyrteng kan long ha ka sngi kaba bud bad ka sngi khatduh ban weng kyrteng kan dei ha ka 23 tarik Risaw.
Kat kum ka khana samari 2011, ki paid Khristan ki don haduh 87% ha ka jingdon briew hapoh ka Jylla Mizoram.
 ba kan pynkylla noh ia ka tarik ban niew vote jong ka elekshon Assembly ha Mizoram kaba la buh ban long ha ka 3 tarik Nohprah.){kind=link}