Shillong, Rymphang 21 : Ka jingiathep vote sha ki 58 tylli ki constituency ka Ri-lum Khasi-Jaintia jong ka elekshon Autonomous District Council, kala iaid shakhmat shaid shaid bad ka dei mynta ka sngi ba ki paidbah kin ai ka rai ia ka lawei jong ki 272 ngut ki kyrtong kiba mih sha ka lympung iakhun.
Ka jingiathep vote kala sdang naduh ka por 7 baje mynstep bad kan kut ha ka por 4 baje janmiet ha baroh ki 58 constituency-29 tylli jong ka KHADC bad 29 tyli jong ka JHADC.
Napdeng ki 272 ngut ki kyrtong, haduh 158 ngut kynthup ia 12 ngut ki kynthei kila iakhun na ki 29 tylli ki constituency ka KHADC katba 114 ngut ki kyrtong kynthup ia 7 ngut ki kyrtong ki iakhun na ki 29 constituency ka JHADC.
Ki kyrtong kiba kham paw ha kane ka elekshon ki kynthup ia u CEM ka KHADC Bah Pyniaid Sing Syiem, CEM ka JHADC Bah Thombor Shiwat, ki CEM barim ka KHADC Bah PN Syiem bad Bah Titosstarwell Chyne nalor ki Executive Member bad ki MLA bad MDC ba mynta.
Baroh ki 58 tylli ki constituency ka KHADC bad JHADC kin don haduh 2,281 tylli ki Polling Station. Ki 29 tylli ki constituency ka JHADC ki dei kiba rit bha katba ki 29 tylli ki constituency ka KHADC ki dei kiba heh kiba jan iasyriem thik kum ki Assembly constituency.
Ki 29 tylli ki constituency ka JHADC ki dei kiba la phiah na ki 7 tylli ki Assembly constituency ka ri-lum Jaintia katba ki 29 tylli ki constituency ka KHADC ki jan long hi kynthup na ki 29 tylli ki Assembly constituency.
Ki Polling station jong ka elekshon KHADC ki don haduh 1798 tylli katba jong ka JHADC ki don tang 483 tylli.
Haduh 13,08,818 ngut ki nongthep vote ka KHADC bad JHADC kin ai ka rai mynta ba kynthup ia 6,32,347 ki shynrang bad 6,76,467 ki kynthei.
Ka KHADC ka don haduh 9,96,518 ngut ki nongthep vote ha kaba 4,81,268 ngut ki dei ki shynrang bad 5,15,247 ki dei ki kynthei. Katba ka JHADC ka don tang 3,12,300 ngut ki nongthep vote ba kynthup ia 1,51,079 ngut ki shynrang bad 1,61,220 ngut ki kynthei.
Ka jingniew ia ki vote kan long ha ka sngi nyngkong bad ka samou treikam ba mynta jong baroh ki artylli ki council kan kut ha ka 5 tarik u Lber, 2025.
