Shillong, Rymphang 19 : Haduh 224 tylli ki Polling Station la ithuh kum ki polling station ba lah ban mih jingkulmar bad ba don jingma ha kane ka elekshon Khasi Hills Autonomous District Council (KHADC) bad Jaintia Hills Autonomous District Council (JHADC), ban long la 21 tarik Rymphang.
Kat kum ka jingpyntip u Commissioner & Secretary ka Tnad District Council Affairs (DCA) Bah Cyril Diengdoh, haduh 129 tylli ki Polling Station n aka 1669 tylli ki dei kiba hap hapoh u pud u sam ka KHADC katba 95 tylli n aka 477 tylli ki hapoh u pud ka JHADC.
Une u Heh Ophisar ula kular ia ka jingbuh bor pahara kaba khlain ha kine ki jaka ban pynthikna ia ka elekshon kaba khuid, kaba iaid beit iaid ryntih.
Haba iakren bad ki nongthoh khubor, u Bah Cyril ula ong “Baroh ki jingpynkhreh kila biang lut. Ngi la shong jingialang bishar kam la bun sien bad ki Deputy Commissioner, kiba pyniaid ia ka elekshon. Ki plan halor ka rukom pahara ruh kala biang lut. Ki Deputy Commissioner kila ithuh ia ki jaka kiba lah ban mih jingkulmar bad ba don jingma ha kaba la buh kham buh ki bor pahara ha ryngkat ka jingiasyllok bad ki SP”.
“Ki Pulit kila sngewskhem ban lah pyniaid beit ia ka elekshon naba kila wanrah bun bha ki bor Pulit kynthup ki home guard bad kumta, kam don jingduna satia” ula ong haba bynrap “Ia kine ki bor pahara la wanrah na kylleng ki jaka ka Jylla bad naba ka elekshon ka long ha Eastern Range, la wanrah bun ki bor pahara na Ri-lum Garo kaba dei ka Western Range ka Jylla” ula ong.
Nalor kane u iathuh ba u Chief Secretary ka Jylla ula pyniaid ruh ia ka jingialang pyrkhat kam bad ki Deputy Commissioner.
“U Chief Secretary ula leit jurip ruh ia kawei na ki centre ha Shillong kaba dei ha ISBT, Mawiong, kaba mih ki nongpyn iaid ia ka elekshon ryngkat ki tiar ki tar bad ruh ka jingniew vote ka ban long la 24 tarik Rymphang” ula iathuh.
