Guwahati, Iaiong 21 : U Myntri kam pohiing ka Ri Amit Shah hynne ka sngi U Blei, ula sdang ia ka jingialap elekshon da ka road show ha Silchar ban pan jingkyrshan ia u Myntri ka Sorkar Jylla bad Nongialam ka BJP Parimal Suklabaidya.
U Suklabaidya ula iakhun na Silchar Parliamentary constituency ban bujli ia u Dr Rajdeep Roy, uba dei u MP ba mynta na Silchar.
Ha ka jingsynran u Myntri Rangbah ka Jylla Himanta Biswa Sarma, u Shah ula ieng halor ka kali bala shna pynwandur bha, kaba don ia ka dur jong u Myntri Rangbah Duh ka Ri hakhmat eh.
U Amit Shah ula kawang ruh ia ki syntiew sha ki paidbah kiba ieng ha baroh arliang ka surok ban peitkai ia kane ka road show wat hapdeng ka jinghap slap.
Bun bah ki paidbah bad ki nongkyrshan ka BJP kila ia ieng ha baroh arliang ka surok ban iapeit ia u Amit Shah. La iohi ruh ia ki nongkyrshan ka BJP kiba la kaweh ia ki lama ka BJP bad pyrta slogan kum ‘Modi-Shah Zindabad. ‘BJP Zindabad’. ‘Bharat Mata ki Jai’ bad ‘Jai Shri Ram’.
Ka Silchar ka dei ka jaka ba khlain bha jong ka BJP bad ka BJP kala ialeh katba lah ban ioh biang ia ka jingjop na kane ka constituency.
Ka Silchar Lok Sabha constituency kan sakhi ia ka jingiakhun hapdeng lai ngut kata hapdeng u Nongialam ka BJP Parimal Suklabaidya, u kyrtong ka TMC Radheshyam Biswa bad u kyrtong ka Congress Surya Kanta Sarkar.
