Goalpara, Iaiong 21 : Ki kynhun sengbhalang na Assam bad Meghalaya hynne ka sngi, kila mynjur ban iakhun ha kaban pynioh ia ka jingbishar kaba hok bad ap ia ka jingmih jong ka jingtohkit halor ka jingshah pyniap bad shah thang ki lai ngut ki nong Assam ha Rongmil.
Ha ka 17 tarik Iaiong, lai ngut ki samla na Assam kila shah pyniap bad shah thang ha Rongmil bad ia ka metiap jong ki la lap na kawei ka thliew bala tep ha ka thain.
Kane ka jingjia kala pynmih ia ka jingpynrem kaba jur na ki kynhun bapher bapher. Ki riewshimkabu kila pyrshang ban pynsaphriang ia ki khubor hamsaia bad ki jingthoh, kiba lah ban wanrah ia ka jingsngew iapher jaidbynriew.
Halor kane, ki kynhun sengbhalang na Goalpara bala tip kum ka All Assam Minority Students Union (AAMSU) bad ki sengbhalang na Ri-lum Garo ba kynthup ia ka GSU, ADE, FKJGP, AAYF bad kiwei, kila iashong jingialang hynne ka sngi U Blei ha Dudhnoi, kaba hap hapoh ka Goalpara District.
Kine ki Sengbhalang kila kyntu ia ki paidbah ba kin kiar na ka jingpynsaphriang ia ki khubor lamler, ki video, ki jingkynthoh ba iadei bad kane ka jingjia. “Kum kine ki kam ki lah ban pynkha ia ka jingiakynad bad kan pynthut ia ka jingwad ia ka jingshisha bad ka jingbishar kaba hok” ong u President ka AAMSU ha ka kyrwoh.
Kine ki Sengbhalang kila ong ba ka jingkhein Jaidbynriew ia ki riew bymman ba leh ia kane ka kam, kam dei ban taplup noh ia ka jingiabeh ia ka jingbishar kaba hok. “ To ngin ailad ia ki bor ka Ain ba kin pynlong ia ka jingtohkit kaba bniah bad ban pynthikna ba kito kiba donkti kin ngat bad shah pynsajia kat kum ki kyndon jong ka Ain” kila ong.
Kila kyntu ia ki paidbah ba kin kiar na kaba pynman ia kane ka jingjia kaba sngewsih sha ka kam iapher Jaidbynriew. “Ka jingpakhang surok lane kynshoit ia ka jingsngew iapher Jaidbynriew kan ktah ia ka jingtohkit bad pynslem ia ka jingpynioh ia ka jingbishar ba hok.
To ngin iabteng ban iatylli ha ka jingkwah jong ngi ia ka jingtohkit ka bym iashah liang” kila ong.
