Shillong, Lber 26 : U kyrtong ka Regional Democratic Alliance (RDA) Robertjune Kharjahrin ha ka sngi Ba-ar ula ong ba ka seng sain pyrthei ba thymmai Voice of the People Party (VPP) kan ym jop satia na Shillong Parliamentary seat, ha kane ka elekshon Lok Sabha ban wan.
U Bah Kharjahrin ula thep kyrteng hynne ka sngi kum u kyrtong hapoh ka Ophis u Deputy Commissioner, Shillong. La synran ia u da u President ka UDP Bah Metbah Lyngdoh bad President ka HSPDP Bah KP Pangniang nalor ki MLA, MDC bad kiwei ki nongialam ki ar party.
Haba iakren bad ki nongthoh khubor, u Bah Kharjahrin ula ong ba ka RDA kan ym weng satia ialade na ka jingiakhun hynrei kan trei shitom ban jop ha kane ka elekshon ban wan.
“Lada phi iaid kat kum ka jingioh vote, ka UDP bad HSPDP lada kyllum lang, ka jingioh vote ka bun eh ha u 2023 bad ngi sngew skhem bha ba ngin nang lah ban ioh bun shuh shuh. Khlem pep, nga sngewskhem ba 100 na ka shispah ngan jop ia ka elekshon” ula ong.
Haba pynpaw ba ka VPP kam dei ka jingma ia ka RDA, u Bah Kharjahrin ula ong “Ka VPP ka dei ka party thymmai ka bym don ki nongtrei ha ki shnong ki thaw. Ka VPP kam don ia ki MLA bad MDC kumba don ma ngi. Ka VPP kan ym don lad ban jop namar ngi kham don lad bha ma ngi haba ianujor bad kiwei pat ki kyrtong”.
“Ngam kwah ban iatai nia bad une u briew (Ardent Basaiawmoit) hynrei ngan shu pynkynmaw ba ula kren teng ha Mawkyrwat ha u snem 2018 ba ki party thymmai kin ym poi shano shano ruh, kumta ha kane ka kynti ruh ka party thymmai (VPP) kan ym poi shano shano ruh” ula ong.
Halor ka jingtreikam u MP ba mynta, u Bah Kharjahrin ula ong ba un ieh ha ki paidbah ba kin bishar hynrei kala dei ka por ban bujli noh ia u Bah Vincent H Pala, uba la long MP la 15 snem mynta.
“Nga burom bha ia u (Pala). U dei u Riew Rangbah hynrei phi la iohi ba u khlem lah ban leh eiei than kumta nga sngew ba ka por kala dei ban bujli noh ia u. Nga thikna ba ki paidbah ka constituency kila ai biang eh ka por ia u ba un pyni kam bad ai ba ki paidbah kin bishar ia kane.
Halor ka rai jong ka BJP ban kyrshan ia ka NPP, une u kyrtong ka RDA ula ong “Ngin kren da kaba shai, kila iatreilang hapoh ka Parliament la bun snem, kila kyrshan lang ia ka CAB, kila ialeh lang ruh ia shibun ki kam kumta ngam lyngngoh satia kin iatreilang ha kane ka elekshon…ai ba u paidbah un bishar ia kane”.
