Boko, Rymphang 24: Kala don ka jingialehkmen ha ki khappud jong ka jylla Assam-Meghalaya ha kaba ki jaidbynriew Garo bad Khasi kila ia wan lang ban ia shad kmen halor ka jingjop u kyrtong khlem seng u Bah Lurshai Kharbani ha ka elekshon Khasi Hills Autonomous District Council (KHADC).
U Bah Kharbani, uba la jop ia ka elekshon MDC na Rambrai-Jyngram constituency da 2,154 vote, ula pynpaw ka jingsngewnguh ia u Blei bad ia ki paidbah halor ka jingkyrshan ka jongki. Ula banjur ba kane ka jingjop kam dei satia ka jingjop shimet ka jongu hynrei kadei ka jingjop lang jong ki jaidbynriew Garo bad Khasi kiba la ai ka jingshaniah ha u. Ka constituency ka kynthup ia ki 16,000 ngut ki Garo bad 28,000 ngut ki Khasi kum ki nongthep vote.
U MLA ka Rambrai-Jyngram u Bah Remington G. Momin, uba la kyrshan ia u Bah Kharbani, ula ai khublei ia ki paidbah bad ula pynthikna ba mynta ryngkat bad u Bah Kharbani uban don ha KHADC, kan don ka jingpynleit jingmut ha ki kam pynroi bad ki kam kiba iadei bad ka bha ka miat ha ka constituency.
Mar ia wan poi ha ka shnong Athiabari kaba don hajan khappud bad ka jyllla Assam, u MLA u Remington Momin bad u MDC uba dang shu jop u Bah Lurshai Kharbani kila shah pynkup burom da ki jain Garo ha ki paidbha nongshong shnong. Kane ka jinglehkmen ka long ruh ha ka shnong Hahim ha Assam bad Athiabari ha Meghalaya, ha kaba ki nongshong shnong kila ia risa bad shad kmen ban khmih lynti ba kan don ka jingwan rah ia ka jingkylla hapoh ka jingialam u Bah Kharbani.
U Bah Lurshai Kharbani ula ioh ia ka jingjop da kaba pynrem ia u Bah Bonniroy Lyngkhoi na ka seng VPP, Bah Bormanding Nonglang na ka seng Congress, bah Dominik Wahlang na ka BJP, u MLA barim u Bah Kimfa Sydney Marbaniang na ka NPP, u Bah K. Phalastingwell Pangniang na ka HSPDP.
Ka Rambrai-Jyngram constituency, kadei kaba don ha West Khasi Hills District, kaba ia donlang ia u pud u sam bad ka jylla Assam. Baroh ar ngut u MLA bad u MDC kila kular ban kyntiew ia ki kam pynroi ha ka thain khappud bad ban trei na ka bynta ban pynneh ia ka jingsuk bad jingshngain hapdeng kitei ki ar tylli ki jaidbynriew.
.){kind=link}