Shillong, Rymphang 24 : Ka Iingkashari Meghalaya High Court ha ka sngi Nyngkong ka la bthah ïa ki bor pynïaid skul jong ka St Anthony’s Lower Primary School ba ki dei ban pynthikna ba ka plan bad ka jingpynwandur ia ka jingtei jong ka skul ba thymmai ka dei ban kham bun ne ïasyriem bad kaba la pynpra.
Ka ïingkashari kaba kynthup ïa u Chief Justice IP Mukerji bad u Nongbishar W Diengdoh ha ka hukum bala pynmih hadien ba shong bishar ïa ka PIL ka la ong, “Da kaba pyrkhat ïa kine ki jingshisha baroh haneng, ngi ailad ïa ki bor pynïaid skul ban tei pat ia ka Iingskul hynrei ka plan bad ka jingpynwandur ia ka Iingskul ka dei ban long kaba kham bun ne kaba isyriem bad kaba la pynpra. Lada dei ban pynkylla ia ka plan bala mynjur, lah ban leh ia ka bad dei ba ioh ia ka jingmynjur na ka Meghalaya Urban Development Authority (MUDA)”.
“Ki bor pyniaid ki lah ban pyniaid shakhmat bad ka jingshna thymmai ia ka Iingskul hynrei kam dei ban pynkylla ia ka hok da kaba ai sha kiwei pat, thaw jingeh ne pyniakhlad bad ka jingbat ia ka nongkynti khlem ka jingbit naka Kashari,” la bynrap.
Ka Iingkashari ka la bthah ruh ïa ki nongshah kynnoh pynkhein hukum (contemnors) ba ki dei ban aiti ïa ka affidavit ha kaba ïadei bad ki jingkylli jong ka ïingbishar hapoh ka 17 tarik u Risaw.
“Mynta, ka jingkylli kaba hap ban jubab ka dei kane “ Ka hukum bala pynmih da ma ngi ka dei kaba la pynmih ha ka 9 tarik Nohprah 2024. Ki bor pyniaid skul ki tip bha ia ka. Ka Iingkashari watla kala khang ha ka shuti Khristmas, ka Vacation bench kala shong bishar khlem sangeh. Balei kane ka jingkam ba ap ka jingma ia ka jingtei bad ka jingdonkam ban pynpra noh ym shym la wanrah sha ka jingtip jong ka vacation bench bad pan jingbit ban pynpra ia ka Iingskul barim?”.
Haba ia kane ka mukotduma la buh ban shong bishar ha ka sngi ba bud jong ka jingplie ia ka Iingkashari ha ka 28 tarik Kyllalyngkot, 2025, balei ha ka por ba ioh shuti ka Iingkashari, ba hap ban pynpra ia kane ka Iingskul, haba la ailad ba kan ieng baroh shikatta?” kala ong.
