Shillong, Rymphang 24: U President ka Meghalaya Pradesh Congress Committee (MPCC) Bah Vincent H Pala u la pynpaw ia ka jingsngewnguh ia ki paidbah ka rilum Khasi bad Jaintia Hills kiba la ai ka jingkyrshan ha kane ka elekshon Autonomous District Council (ADC) kaba dang shu kut shen.
“Watla ka Result jong ka elekshon kam noh shaka liang ka Congress hynrei nga sngewnguh shibun eh ïa ka jingaiti bad jingshaniah kaba khlem artatien ba la pyni da ki nongkyrshan bad ki nongtrei ka Party” ong u Bah Pala ha ka kyrwoh.
Lah ban kdew ba ka Congress ka la jop tang 3 Seat ha Jaintia Hills Autonomous District Council (JHADC) bad ka khlem lah satia ban jop ha Khasi Hills Autonomous District Council (KHADC).
“Nga kwah ban ai khublei ïa baroh ki kyrtong jong ka Congress jong ngi kiba la ïakhun tyngeh ha kane da elekshon wat hapdeng ki jingeh kiba bun, kynthup ïa ki jingbyrngem, shah shet kylla bad kiwei ki jingeh. Ka jingaiti lut jong phi ïa ki nongrim jong ka seng Congress bad ka jingpyrshang ba khlem sangeh jong phi ha kaba shakri ïa ki paidbah kan long kaba kordor bad kaba burom” u la ong.
U President ka Congress u la ai khublei ïa baroh ki kyrtong kiba jop, khlem da kheiñ ïa ki Party kiba ki don bynta. “Ki paidbah ki la buh ïa ka jingshaniah ha phi, bad nga kyrmen skhem ba phin trei da ka jinglong ba janai bad ka jingkitkhlieh ban pynneh pynsah ïa ki jingmyntoi jong ki jaidbynriew trai ri bad ban ïada ïa ka mynsiem jong ka Khyrnit kaba Hynriew.”
“Ka Seng Congress ka dang iai bteng ban pynkhlain ia ka synshar paidbah kaba rit paid, ban iada ia ka hok jong ki paidbah jong ngi, bad ban pynthikna ba ka roi ka par kan poi sha man la ki thliew iing jong ka Meghalaya. Ngin iai bteng ban shakri ia ki paidbah da ka jingkut jingmut kaba thymmai, ban ioh jinghikai na kane ka jingshem bad ban ialeh ban tei pat bad ban pyniasoh biang bad ki jingangnud jong ki paidbah” u la bynrap.
U Bah Pala u la pynthikna ruh ïa ki paidbah ka Meghalaya ba ka Congress kan ïai neh ha ka thong jong ka ban shakri da kaba hok, kaba kynthup lang ïa baroh, bad daka jingaiti lut.
 Bah Vincent H Pala u la pynpaw ia ka jingsngewnguh ia ki paidbah ka rilum Khasi bad Jaintia Hills kiba la ai ka jingkyrshan ha kane ka elekshon Autonomous District Council (ADC) kaba dang shu kut shen.){kind=link}