DIBRUGARH, Iaiong 9: U Myntri ka Sorkar Pdeng bad Myntri Rangbah barim ka Assam, Sarbananda Sonowal, ha ka sngi Palei, u la pynpaw ïa ka jingkyrmen ba skhem ba ka kynhun synrop NDA ba la ïalam da ka BJP, kan jop kumba 100 seat na ki 126 tylli ki constituency ha ka elekshon sha ka Ïingdorbar thaw ain ka Assam, kaba dang ïaid shakhmat mynta, hadien ba u la dep thep ïa ka vote ha Dibrugarh.
Haba kren sha ki nongthoh khubor shabar jong ka jaka thep vote, u Sonowal u la ong ba ka jingwan ki nongthep vote kiba la mih ryntih wat hapdeng ka jingpynthud u slap bad ka jinglong ka suin bneng kaba sniew ka pyni ia ka jingkyrshan kaba jur jong ki paidbah ia ka kynhun synshar.
“Ki paidbah ki kwah ba ka sorkar NDA ba ialam da ka BJP kan wanphai biang ha ka bor synshar ha Assam.Kata ka long kaba donkam eh na ka bynta ban pynthikna ia ka jingsuk bad ka roi ka par kaba neh ha ka jylla”, u la ong.
U la ai ka jingiaroh hapoh ka jingïalam jong u Narendra Modi na ka bynta ka jingkmen kaba paw hapdeng ki nongthep vote, da kaba bynrap ba ki briew ha kylleng ka jylla ki la ïoh jingmyntoi na ki kam pynroi bapher bapher ba la shim da ka sorkar kmie.
U Sonowal u la kdew ruh ïa ka jingïashim bynta kaba shit rhem bad kaba jur ha baroh ar ki jaka jong ka Barak Valley bad jong ka Brahmaputra kum ka sakhi jong ka jingkyrshan kaba radbah ïa ka NDA.
Dibrugarh, la sakhi ïa u lain ba jrong bha ha ki jaka thep vote naduh ka por 7 baje mynstep, ha kaba ki nongthep vote ki ap tmang ban thep ïa ki vote watla u slap u jur bha.Haduh ka por 11 baje mynstep, ka Dibrugarh constituency ka la poi kumba 32.87 percent ki nongthep vote.
