Elekshon 2023: Pyrta shla ka Meghalaya ia ka ‘Jingkylla’ ha ka Synshar Khadar

Date:

Share post:

Khang lynti ka bor pisa ia ki briew ba thrang ban pynkylla dur ia ka Jylla

Shillong, Naitung 08: Katba ka Jylla Meghalaya ka dang pynkhreh ia ka jingwan jong ka samoi jied nongmihkhmat ba thymmai sha ka Iingdorbar Thaw Ain ka Jylla ne Elekshon MLA, ka ban long ha u snem 2023, ki Nongshongshnong kila sdang ban iakren ia ka jingdonkam ka Jylla ia ka “Jingkylla” ha ka synshar khaddar ka ban kyntiew ia ka Jylla bad ia ki Nongshongshnong ha baroh ki liang.

Ka jingiakren kala mih ruh halor ka jingdonkam jong ka Jylla ban sei noh da ki Nongmihkhmat ki ban long ki “Statesman” ha ka jaka ki Nongmihkhmat kiba pyrkhat beit thik tang kumno ban jop ia ki elekshon bad buh shadien ia ka kamram ba ki dei ban leh ha kaban iada, kyntiew, pynkhlain ia ka Jylla ha baroh ki liang.

“La 50 tylli ki snem ngi la ioh iala ka jong ka Jylla bad ngi la iohbat hi halade ia ka synshar khaddar kaba pura, hynrei ngim iohi bad ngim lah len ba kak dei satia ka jingkiew hynrei ka jinghiar jong ka Jylla” ong u Bah Lambokstar Marngar, President ka Khasi Students Union (KSU) haba iakren bad Ka Shlem.

“Ka jingbym lah jong ka Jylla ban kiew ka dei namar ka jingsynjor palat ka pyrkhat pyrdain jong ki paidbah kiba jied ia ki Nongthaw Ain ki ban pynwandur bad ohshrong ia ka Jylla da ki ain ki ban kyntiew bad ban iada ia ki Nongshong shnong khamtam ki trai ri trai muluk” ula bynrap.

Haba pynpaw ba Jylla Meghalaya kala donkam mynta ban jied noh da ki Nongthaw Ain ki ban long ki “Statesman” (ki nongthaw ain kiba iohi jngai, kiba don ka Mission bad kiba don ka mynsiem ban shakri naduh mynsiem bad kyntiew ia ka Jylla) ym shuh ki Nongsam skhim, une u Nongialam ka KSU ula ong ‘Lada ngi kwah ba ka Jylla kan khlain, kan kiew irat bad ba ngin iohi shisha ia ki Policy treikam bapher bapher kiba iaid kat kum ka jingdawa ka por bad jingangnud u paidbah, kala dei ka por ban jied ia ki Nongthaw Ain ym shuh ki Nongsam Skhim”.

“Ka jingbym don kum kine ki briew ha ka Synshar ka khaddar ne ban thaw Ain, ka dei ka daw ba pynbor ia ki Sengbhalang ban hap mih sha surok ban dawa ia ki Ain ki kanun ki ban iada ia ka Jaidbynriew. Ki jingdawa kila buh bah hynrei baroh kila sahkut ha suin namar ka jingbym don ka Jylla ia kum kine ki Nongthaw Ain kiba buh ia ka Jylla bad ka Jaidbynriew hakhmat ban ia ka myntoi shimet” ula ong.

“Ki paidbah kin hap ban sngewthuh bad buh jingkylli shimet shimet ba ngin jied ia ki Nongsain dur na ka bynta ka pateng ban wan lane ia ki briew ki thrang bad angnud ban jop biang ha ka elekshon ban wan” ula bynrap.

Une u Nongialam ka KSU ula ong ba ka jingtrei borbah jong ka pisa ha ka Elekshon ka dei ka daw bah ba ka Jylla kam lah ban sei ia ki Nongthaw Ain kiba tbit ne ki Statesman haba ong “Katba ka Jylla ka dang jied ia ki nongmihkhmat lyngba ka pisa, ka synshar khaddar kam dei shuh kaba iakren ia ki ain hynrei kaba iakren ia ki business”.

“Lada ki paidbah ki sangeh noh ia ka jingiakren pisa ha ka por elekshon, khlem pep ki jingkylla kin sa wan ha ka synshar khaddar ha Jylla bad ka Jylla kan sa iohi ruh ia shibun ki jingkylla ha baroh ki liang” ula ong.

“Ka Jaidbynriew ka don kyrhai ki briew kiba stad, ba shemphang, kiba ieid ia ka Ri bad ka Jaidbynriew bad kiba thrang ban shakri kum ki Nongthaw Ain, hynrei tang namar ka jingbym don pisa, kala pynbor ia ki ban shu hun jia kat kaba jia, long kat kaba long” ula bynrap.

Haba pynpaw ba ka por kala dawa ia ki Nongshongshnong ba kin pyndonkam hok ia ka iktiar bad ban pyrkhat bha iala ka jong ka lawei, u Bah Lambok ula ong “Ngim dei shuh ban iapein ia ka jingtbit (quality) jong ki Nongthaw ha ka bor jong ka pisa ha kane ka kynti jied nongmihkhmat ban wan ha Jylla ne ha kiwei kiwei ki jingsngew kum ka jingsngew para niam, para kur, para thain bad kiwei kiwei”.

“Lada ngi iakren ia ka jingtbit (Quality) jong ki Nongthaw Ain, kala dei ka por ia ki paidbah ba kin da it bad da thew bha ia kiba kum kino ki briew ba dei ban phah sha ka Iingdorbar Thaw Ain ka Jylla”ula ong haba bynrap “Kane ka long kaba donkam tam ha ka kam jied nongthaw Ain khnang ba kan nym mih shuh ka jingiakhnium na ka por sha ka por”.

Haba pynsngew ia kane ka juh ka sur, u President ka seng Hynniewtrep National Youth Front (HNYF) Bah Sadon Blah ula ong “Ka jingbym hun bad jingiaknium jong ngi ki paidbah ha baroh kine ki 50 tylli ki snem ka dei namar ba ngi ki paidbah ngi pynlong ia ka elekshon kum ka tamasa ba lai bnai, ka tamasa iashad iakmen, iaput iatem”.

“Ka jingkylla hi kan nym wan tang na ki Political Party ne ki Politician kiba dei ki Agent of Change (Nongwanrah ia ka Jingkylla) ha ka kam sain pyrthei lada u paidbah hi um kylla” ula ong haba bynrap “Katba dang iai long ka tamasa, da lei lei ruh kan ym wan satia ka jingkylla”

“Ngam lah ban kynnoh ia ki Political Party ne ki Politician ia kane namar haba u paidbah u long ha kata ka rukom, ki run kim banse ban pynhun ia ka jinglong u paidbah. Kane ka dei ka snur (web) kaba eh ban law ia u sohkyrdot” ula bynrap.

Halor ka jingdonkam ka Jylla ia ki Statesman, u Bah Sadon ula ong “Nga nud ban ong ba haduh mynta la 50 tylli ki snem ngim pat ioh ia u Statesman. Hangne ruh ki don shibun ki daw ba pynlong ia ka Jylla ban shem jingeh ha kaban sei ia kita ki Statesman”.

“Kawei ka jingeh hangne ka long ba baroh ki sngew ba ki dei ki Nongialam kaba lam pat sha ka jingpynpharia ia ka Jaidbynriew, ia ki Political Party ha ka kyrteng jong ka elekshon. Ka jingbym don discipline jong ki Political Party ruh ka dei kawei ka daw” ula ong.

Une u Nongialam ka HNYF ula pynsngew ruh ba kawei pat ka daw jong kane ka dei ka jingpyndonkam ia ka bor pisa ha ka elekshon haba ong “Kumba long mynta hi, tang ki briew kiba don da ki klur kiba lah ban rung ha ka kam sain pyrthei, kyrsum ha ka sain pyrthei bad iohbor ha ka kam sain pyrthei. Kane kala khanglad bad ka lynti kan ym plie satia ia ki briew kiba kwah ban shakri hok, kiba don ka mynsiem ban pynwandur thymmai ia ka Jylla”.

U Nongialam ka Federation of Khasi Jaintia & Garo Peopls Bah Eldie N Lyngdoh uba dei u General Secretary kane ka Seng, ula ong “Kine ki Nongmihkhmat ba mynta kim dei atia ki nongialam kiba peit ia ka jingeh jong ka Jaidbynriew hynrei kiba peit ia kane ka kam nongmihkhmat kum ka Business”.

“Ngim lah ban len ia kane. Katno ngut ki MLA jong ngi mynta kiba dei ki businessman te haei ngin ioh ia ka Jylla kaba don jingkyrmen ba kan kiew irat” ula ong haba bynrap “Ngi kyrmen ba ka elekshon MLA 2023 kan don noh ka jingkylla ha ka pyrkhat pyrdain u paidbah nongthep vote khnang ban lah sei ia ki Nongmihkhmat kiba iohi jngai n aka bynta ka ri bad ka Jaidbynriew”.

Kat kum ka jingong une u Nongialam Sengbhalang “Ka jingmih jong ki Businessman Politician ka dei ka daw bah ba ka Jylla kam lah haduh kine ki sngi ban sei ia ki “Statesman” kiba pyrkhat bad iohi jngai ia ka lawei jong ka Jylla bad ka Jaidbynriew”.

U bah Eldie ula ong ba ka jingialehkai da ka Pisa ha ka kam jied nongmihkhmat ka dei kaba buh jingma kaba khraw bha ia ka Jaid bynriew. “Kaei hi ngin khmih lynti na ki briew kiba shu thong da ka pisa ia ki paidbah ban jop elekshon. Ka dei kane ka daw ba ki ishu jong ka Jaidbynriew kila shu sahteng mynta la san phew tylli ki snem”.

“Nga iohi ia ka jingma ba hakhmat eh mynta ka long ba ki Politician kila pynmlien ia ki paidbah da ka pisa haduh ba ki jingkylli kiba mih ia ki kyrtong ka long shuwa ba haduh katno ki don pisa khlem da buh pat ia ka jingdonkam ba hakhmat eh ba haduh katno ki iohi jngai, ka thong ba ki don bad ka mynsiem ban shakri ba ki don ia ka Jaidbynriew bad ka Jylla” ula ong haba bynrap “Kine kiei kiei ki dei kiba pynkha ia ki jingeh kiba ka Jylla kala mad mynta.

Haba pynpaw baka Jylla kala donkam mynta ia ki briew kiba shim ia ka kam Nongmihkhmat ban long ki Nongthaw ain ba shisha ym kiba shim ia ki Constituency kum ki jaka ban kynshew (Invest) ban pynkhie spah, u Bah Eldie ula ong “Ka jingkylli ka mih mynta ba ki 60 ngut ki MLA ba ngi phah sha Iingdorbar Thaw Ain, kila leh aiu haduh mynta…kaei ka synniang kaba kila ai sha ka bha ka miat jong ka Jaidbynriew hynrei ngi iohi pynban tang ki jyrsieh bapher bapher bad kane ka dei ka jingjop jong ki kum kita ki MLA”.

Kine ki Nongialam Sengbhalang kila pyrta shla ba ki Nongshongshnong ki dei ban kylla thiah kylla dem bad ban pyrkhat sani ba ka jingdie tad dor ia ki vote jong ki haba jied ia ki Nongmihkhmat, kam wanrah satia ia ka jingiohnong bad jingmyntoi jong ka Jylla ne ka Jaidbynriew hynrei ka dei ka jingtim ia ka lawei bad ka pateng jong ki ban dang wan kiba dei ki Khun ki Kti jong baroh hi ki Nongshongshnong ka Jyla.

Share post:

spot_img

Popular

More like this
Related

Iasoi MoU ka Sorkar ban seng ia ka Green Skill Academy ki samla ha Shillong

Shillong, Rymphang 28 : Ka Sorkar Meghalaya hynne ka...

Pan jingmut ka BJP na u paidbah ban pynkhreh ia ka Manifesto elekshon Lok Sabha

Shillong, Rymphang 28 : Kum shibynta jong ka ‘Viskit...

Megh Govt inks MoU to set up India’s second Green Skills Academy for youth in Shillong

Shillong, Feb 28: Making a major move to empower the...

Manipur : Pyndem suloi ki Pulit Commando ka Manipur ha Imphal

Imphal, Rymphang 28: Ka kynhun ki Pulit Commando ka...