Shillong Nailar 22: U President ka BJP Meghalaya Unit u Bah Ernest Mawrie u la pyntip ba ka BJP kan pynieng ia palat 10 ngut ki kyrtong ban iakhun iaka elekshon MLA 2023 na rilum Garo.
“Kumba ka long mynta, ka BJP kan pynieng palat 10 ngut ki kyrtong ban iakhun iaka elekshon MLA na rilum Garo bad ka seng ka kyrmen skhem ba kine ki kyrtong lyngba ka jingkyrshan jong ki paidbah kin poi sha ka thong” ong u Bah Ernest Mawrie uba don mynta ha rilum Garo ban pynkhlain iaka seng BJP.
U la iathuh ba ula iakynduh ia ki dkhot bad nongkitkam jong ka seng ha kaba kila iatai sani naka bynta pynkhlain iaka seng bad khamtam eh ha ki Constituency kiba ka BJP kan pynieng ia ki kyrtong.
U Bah Ernest u la ong, ba ka BJP kala nang khlain ha rilum Garo bad hynne ka sngi palat 50 ngut napoh Selsella constituency kila wan ban pyniasoh bad ka BJP.
Ha kajuh ka por u pyntip ruh ba ula iakynduh ia ki nongkitkam bad dkhot jongka seng kiba la don palat 300 ngut eiei ba kynthup ia u National Executive Member jongka Kisan Morcha u Charles M. Sangma, u State Executive Member u Edmund K Sangma, ka MLA barim ka jylla ka Bluebell R Sangma bad kiwei kiwei ban pynkhlain bad ban pynsuhthied iaka BJP ha rilum Garo bad ban shim ia ki lad ki lynti ban pyniaid shakhmat ia ki kam ki jam jong ka seng.
Hashwa kane u President ka BJP u la iakynduh ruh ia ki District In-charge, District Presidents, Morcha Heads kynthup iaki Mahila Morcha bad Yuva Morcha.
