Eksam CUET | Palat 2 kynta hap ap ki samla pule ban ioh thoh ia ka sobjek English ha NEHU

Shillong, Jymmang 15 : Ki samla pule kiba iakhun ia ka eksam Common University Entrance Test (CUET) ha NEHU Centre, kila hap ban ap palat 2 kynta ban ioh thoh ia ka eksamin jong ka sobjek English.

Ka National Testing Authority (NTA) kala buh ia ka por 3 baje ban pynsdang ia ka eksam jong ka sobjek English bala aipor 45 minit hynrei ka NEHU Centre ka dang lah ban pynlong ia kane ka eksam ba 3 baje haduh ka por 5:15 baje janmiet.

 

View this post on Instagram

 

A post shared by Ka Shlem Khasi News (@kashlemnews)

Ki samla pule kiba dei thoh ia kane ka eksam ha ryngkat ki Kmie Kpa kiba leit synran, kila sah ha ka umdum halor ka rukom pyniaid jong ki bor khmih ia kane ka eksam ha NEHU Centre, kiba la iaid lait ia ka por bala buh da ka NTA.

Ki Kmie Kpa bad ki samla pule kila ialum paidbah hakhmat ka Centre ban pan jingpynshai ia kane ka jingleh jong ki nongpyniaid ia ka eksam, kaba lah ban ktah ia ka lawei jong ki Khun ki Kti jong ki, ba kin ioh bteng ia ki jingpule lane ioh rung College.

Ka khubor ka iathuh ba sa ki samla kiba dei ban iakhun ia ka eksam ba 5 baje jong ka General Test, ki khlem pat ioh shong thoh eksam satia kat haduh ba thoh ia kane ka khubor.

Haba iakren bad ki borkhmih,kila pyntip ba kane ka jingslem baroh ka dei na ka daw ka jingthut jong ka Biometric system.

U Registrar ka NEHU, Col. Omkar Singh (Retd), ula iathuh ba ka jingslem ka dei namar ka jingthut jong ka Biometric System, kaba donkam ia ki samla pule ban pynthikna ialade kum ki nongiakhun ia ka eksam shuwa ba kin rung ha ki kamra thoh eksam.

U Singh ula ong ba hadien ka jingshem ia ka jingbym treikam ka machine, ki bor pyniaid ka NEHU kila pyntip mar mar sha ka National Testing Authority (NTA_ ban pan jingbit ha kaban pynlong ia ka eksam khlem ka Biometric system. Ula ong ba katba ym pat ioh ia ka jingbit na ka NTA, ia ka eksam ym shym la lah satia ban pynlong.

Halor ka jingkynnoh ia ka jingbym lah ka NEHU ban pynkhreh bha, u Singh ula pynshai ba ka NEHU ka dei tang kaba ai jaka ban pynlong ia ka eksam bad baroh ki jingpyniaid ia ka eksam la leh hapoh ka jingkhmih ka NTA. Hynrei, ula kubur pat ba ka NEHU kala dei ban pynkhreh bha haba iadei bad ka jingbun ki briew.

Ki Kmie Kpa kila pynpaw ruh ia ka jingbynniaw halor ka jingbym biang ka rukom tah ia ki roll nombor bad ki jaka shong thoh eksam ha kane ka Centre bad ong ba watla ki samla pule kila poi ha ka por kaa biang, ka jingbym biang ki rukom ai jingtip kala lap sha ka jingpynkulmar jingmut ia ki samla.

U Registrar ka NEHU ula ong ba kat kum ka jingtip jong ki borkhmih ka skulbah, wat hapdeng ka jinglong jingman kaba mih na ka jingslem ban pynlong ia ka eksam, ym shym la don pat ki samla kiba duh ban thoh ia ka eksam.

Haba kylli halor ka jingkynnoh ba katto katne ngut ki samla la hap ban pynkit sha hospital namar ka jingmynsaw na ka jingiaknieh rung shapoh ki kamra thoh eksam, une u Registrar ula kyntait ban kynthoh ia kane ka bynta.