Aizawl, Jylliew 30 :U Myntri Rangbah ka Mizoram u Zoramthanga u la pynpaw ka jingsngewkhia ka ba jur halor ka jingkynrei jong u drok ha ka jylla bad ong ba ki bor Sorkar ki dei ban nang leh tyngeh shuh shuh khnang ban lah rat diengkhong ia une u jait jingdih ba shyrkhei na ka jylla.
Na ka liang u CM ka Mizoram u la ong ruh ban rat diengkhong ia u drok ka donkam lyngba ka jingiatreilang da ki sorkar jong ki jylla bapher bapher. Kumjuh u la khot ruh ia ki kynhun seng bhalang bad ki balang hapoh Mizoram ba kin shim shuh shuh ia ki sienjam ban tehlakam ia une u jait jingdih ba triem.
Ia kane u CM Zoramthanga u la pynpaw ha ka jingialang ka ba la long ha Aizawl. Na ka liang ki bor pahara ki la ioh kurup ia ki jait drok bapher bapher ha ki jingkhynra ki ba man la ka sngi ha ki bynta bapher bapher ka jylla.
U drok u ba shongdor da ki phew phew lak tyngka la ioh ban kurup da ki tnat sorkar bapher man la u bnai. Dang ha ka 28 tarik mynta u bnai, ki pulit ka Champhai ka Mizoram ki la ioh ban kurup ia u drok heroin u ba shongdor haduh kumba T.133 lak ha ki jaka iew beain jong ka pyrthei.
Kumjuh ruh ha ka 27 tarik mynta u bnai, ki bor pulit ki la ioh ban kurup ia u drok methamphetamine tablets u ba shongdor haduh kumba T. 1.74 klur na ka nongbah Aizawl.
