Shillong, Naiwieng 3: Ka United Democratic Party (UDP) ha ka sngi Baar kala ong, ba ki jaka sorkar ha Khasi Hills kim dei kiba don shabar u pud u sam jong ka Khasi Hills Autonomous District Council (KHADC).
U General Secretary ka UDP u Bah Titosstarwell Chyne ula ong, ba ka seng kala dep ban iengskhem ha ka nongrim ka jongka bad kan sa pynbna paitbah noh shen lyngba ka UDP Shillong City.
“Ka CEC kala dep ban pynkhamti ia kane ha ka UDP Shillong City bad shen na ka liang jongka Shillong City, ngin sa shim ia ka rai kumno ban kren halor katei ka mat” la ong u Bah Chyne.
Haba iada ia ka KHADC kaba la leit khangtala ia ka Ropeway Project, u Bah Chyne ula ong, ba ka aiñ ka bthah ia ki bym dei Khasi ba kidei ban shim ia ka Trading Licence haba ki leh ia kano kano ka kam khaii pateng hapoh ka Jylla.
“Ha ka jingshisha, ki Rule ne ka Aiñ kila kdew shai ba mano mano ruh ki bym dei ki trai shnong ne trai jaka, kaba mut ki bym dei Khasi, haba ki wan ban leh ia ki kam khaii pateng ha ka jaka ka jong ngi, la kum ki riewshimet ne kum ka kompani, kaba kham kongsan eh, kadei ba ki hap ban shim nyngkong eh ia ka Trading Licence. Kata ka long kaba shai kdar” ula ong.
Ula kyntait ban kren eiei halor ka jingslem jong ka Council ban shimkhia ia kane ka mat bad ka ong, ba kadei ka Executive Committee kaba ialam da ka VPP kaban dei ban ai ia ka jingbatai kaba bniah.
Halor ka jingkhang tala ia ka ophis, u Bah Chyne ula ong, katkum ka aiñ kan shong eh ha ka jinglongtrai.
“Lada kadei ka jaka kaba longtrai da ka sorkar, kumta ngi ngim don hok ban ong eiei. Hynrei lada kadei ka jingdon jingem jong ka kompani, kan shong eh ha ka EC, ha kano ka rukom kila pynshong nongrim lyngba ka aiñ ban leit ban khang tala ia katei ka ophis” ula ong.
U Bah Chyne ula pynshai ruh ha kaba iadei bad ka jinglong jingman jong ka kyrdan Sixth Schedule.
“Hapoh jong u pud u sam jong ka Sixth Schedule, ki don ruh ki jaka jong ka sorkar bad ha kitei ki jaka sorkar, kam mut ba utei u pud u sam jong ka District Council kan ym treikam pat” ula ong.
“Lait noh tang ia ka European Ward kaba ym shim la kynthup ha ki jaka jong ka Sixth Schedule, ka Sixth Schedule hi ka hap hapoh jong ka District Council” ula bynrap.
