Shillong, Naiwieng 3: Ka United Democratic Party (UDP) ha ka sngi Ba-ar ka la shim ia ka rai ban pynduh noh shuwa ia ka thup jong ki kyrtong jong ka ha ka elekshon sha Garo Hills Autonomous District Council (GHADC) namar ka jingthmu ban phiah constituency.
Haba pynbna ia katei ka rai hadien ba la wai ka jingialang jong ka Central Executive Committee (CEC), u General Secretary ka UDP Bah Titosstarwell Chyne u la ong ba ka party ka la pynbna ia ki kyrtong ha u snem ba la dep, hynrei ka elekshon ka la shah pynkynriah arsien.
“Ngi la iakren ruh ia ka elekshon sha ka Garo Hills Autonomous District Council, ha kaba ka party ha u snem ba la dep ka la pynbna ia ki kyrtong jong ngi,” la ong u bah Chyne.
“Namar ka jingpynkynriah ia ka elekshon ar sien, bad ha kane ka jingpynkynriah kaba khatduh, la pynbna ba kan don ka jingphiah constituency kiba hap hapoh ka GHADC,” u la ong.
U bah Chyne u la ong ba ka jingphiah constituency kan ialam sha ka jingpynbeit thymmai ia ki shnong kiba hap hapoh ki constituency, kaba pynlong ia ka thup kaba kham mynshuwa ban long kaba khlem jingmyntoi.
“Ngi sngewthuh ba hadien ka jingphiah constituency, kan don ka jingpynbeit thymmai ia ki shnong kiba hap hapoh ki constituency.Kumta ngi ong ba ia ka thup kyrteng kaba ngi la pynbna, ngin pynduh noh shwa ia ka,” u la ong.
Ka CEC ka la shanniah ia ka Organising Committee ban leit jngoh ia baroh ki Constituency ban pynbeit thymmai ia ka party.
“Ka CEC ka la ai jingkyrshan ia ka organising committee ban leit sha baroh ki konstitwensi na ka bynta ban pynbeit thymmai ia ka seng, khamtam ha kito ki constituency ba ki MLA ki phet sha kiwei pat ki seng, ban tei ia ka seng,” la ong u bah Chyne.
