Shillong, Naiwieng 03 : U Symbud Myntri Rangbah Bah Prestone Tynsong ha ka sngi Ba-ar ula ong ba ka NPP ka khlem beh ia ka UDP na ka Sorkar MDA-II.
Kane ka jingkren jong u kala mih tang da ki kynta hadien ba ka UDP ha ka jingialang CEC kala shim ia ka rai ban weng noh ia ka jingkyrshan ia ka Sorkar MDA hadien ba u President Bah Metbah Lyngdoh ula hiar shuki kum u Myntri Sorkar.
“Hooid, ngi iatreilang, hynrei kam dei ba ngi beh noh ia ki. Lada ki mih, ngin ong aiu shuh ma ngi” ong u Bah Prestone.
Halor ka jingktah kane ka jingweng jingkyrshan, ila ong “Nga dang shu tip ia kane mynta hi. Kumno kan ktah ia ngi?. Ia mynta ngi don 36 ngut”.
U Bah Prestone ula bynrap ba ka NPP ka kwah ban bteng ia ka jingiatreilang bad ka UDP hadien habud.
“Hynrei ngi la ong ba ka jingkular ban bteng ia ka jingiatreilang kan don beit, ka lah ban nym long tang ia ka mynta, ka lah ban dei hadien h 2028, dei kane kaba ngi kwah” ula ong.
