Shillong, Nailar 19: U Myntri ka tnad Public Health Engineering u Marcuise N Marak ula banjur ba ka jingpynpoi ia ka umbam umdih kaba shngain bad ba lah ban shaniah hapoh jong ka Jeevan Mission (JJM) kala long kaba kongsan bha namar ka Meghalaya ka dei kawei na ki jylla ka ri kaba kiew sted bha ha ka ioh ka kot.
Haba kren ha ka jingialang bishar bniah halor ka JJM 2.0 bad IMIS Data Entry kaba la long ha Windermere, Shillong dang shen, u Marak ula ong ba ka jingshimkhia ban don ka jingiatreilang da ka tnad kan long kaba kongsan bha ban pynlong ia kane ka mission ban kynjoh sha ka thong.
Ula pynpaw ia ka jingkyrmen ba lyngba ka jingiakren bad jingiasyllok ha katei ka jingialang kan iarap ia ka tnad ban sngewthuh kham bha ia ka jinglong jingman baroh bad ia ki jingtynjuh bad ban pynwandur ia ka lynti iaid kaban pynleit jingmut ha kaban weng ia kitei ki jingeh.
Ha kane ka jingialang la wan ban iashimbynta da u Commissioner & Secretary bad Mission Director ka JJM Meghalaya u Pravin Bakshi, u Chief Engineer ka PHE Bah RS Nongbri, ki Engineer bad Sub-Divisional Officer na kylleng ki bynta ka jylla kiba la khmih bniah ia ka jinglong jingman baroh ia ka jingpyntreikam ia ka JJM bad ka IMIS Data Entry.
U Chief Engineer Bah RS Nongbri ula banjur ia ka jingkongsan ban khmih bniah ia ka jingiaid shakhamt jong ka kam, ban ithuh ia ki jingduna bad ban wad ia ki lad ban pynbeit noh.
Ula wer ruh ban don ia ka jingpynkhlain ha ka rukom ai jingshakri ha ki shnong ki thaw da kaba iaid nangne shakhmat.
Ha katei ka jingialang, u Pravin Bakshi ula ai ka jingbatai kaba bniah halor ki mat kiba kongsan jong ka mission.
Kane ka kynthup ia ka Har Ghar Jal kumba la buh thong man la ka snem hapoh jongka Composite Implementation Reform Plan (CIRP), ka jinglong jingman jongka scheme kaba la shna pyndep pura 100%, ka jingpynrung ia ki dur jong ki jaka bad ka jinglong jingman baroh jongka scheme ha kylleng ki Division.
Ki Ophisar na ki district bapher bapher kila pynpaw ha u Myntri Sorkar bad ki heh ophisar ia ka jingiaid shakhmat jong ki kam ki jam baroh, ka jingmad ia ki jingtynjuh ha kylleng ki Division bad ki sienjam kiba dei ban shim ban pynkloi noh ia ki kam kiba dang sahteng.
Ka jingialang kala banjur ruh ban pynthikna ba dei ban pyndep ia ki kam ha ka por kaba la buh, kaba paka bad ban long thik katkum ka jinglong jingman kaba mynta ha ka jingai ia ki jingtip lyngba ka Data Entry ha ka IMIS Portal khnang ba kane kan pyni ia ka jinglong jingman kaba shisha ha ka jingpyntrei ia ka kam ha ki shnong ki thaw.
Ha kaba iadei pat bad kiwei ki mat jong ka tnad ban pynbha ia ka jingiatreilang, ka jingai ia ka jingkhein jingdiah bad ka jingtreikam kaba khuid ba suba bad ka jingpyntrei ia ki kam ka PHE ha ka por kaba kaba la buh kadei ruh kaba la iakren ha ka jingialang.
Haba pynkut ia ka jingialang, u Pravin Bakshi ula ai khublei ia baroh ki nongiashimbynta bad iengskhem ia ka jingdonkam ban don ia ka jingiatreilang kaba neh bad kaba khlain ha ki kyrdan ki bapher bapher ban shimkhia ia ki jingeh bad ban pyniaid shakhmat ia kane ka mission ba kan long kaba ryntih bad kaba treikam bha.
 kala long kaba kongsan bha namar ka Meghalaya ka dei kawei na ki jylla ka ri kaba kiew sted bha ha ka ioh ka kot.){kind=link}