Shillong, Jylliew 25 : U Deputy Commissioner ka West Jaintia Hills Abhinav Kumar Singh, ula pyntip ba dei ka Karbi Anglong Autonomous Council (KAAC) kaba wan thungdieng ban shna jingshna ha Loom Pynthor- ka daw bah ba pynmih ia ka jingiakynad ha khappud ha ka step sngi Balang.
Kat kum ka jingong jong u, ka Karbi Anglong Autonomous Council (KAAC) kala wan thung ia kine ki dieng khlem ka jingpyntip ha ki bor pyniaid District bad ki Pulit jong ka Assam bad Meghalaya.
Ki paidbhur ba don kumba 400 ngut eiei na Lapangap bad ki shnong ba marjan ka West Jaintia Hills ha ryngkat ki kynhun Sengbhalang, kila hiar hynne ka step sha Loom Pynthor bad jynrat naphang ia ki jingthung jingtei bad ki jingtei jong ka KAAC kum ka dak ka jingpyrshah ia kaba ki ong ba ka dei ka jingthmu jong ka KAAC ban kyntur ia u pud ka Meghalaya.
U Abhinav Kumar Singh ula pyntip ba ka kynhun ki Pulit bad laingut ki Magistrate kila don ha katei ka thain ban peit thuh ia ka jinglong jingman, ban iatreilang bad ki bor District ka Assam ha ka ban tehlakam ia ka jingshongsuk shongshngain.
“Ha ka jingshisha, ki bor District kila ioh jingtip ia kane ka jingwan thungdieng ka KAAC la kumba shitaiew eiei. Hadien ba ngi ioh jingtip, ngi la pyrshang ban tem ia ki briew jong ngi ba kin nym leit sha katei ka jaka namar ba kan sa don ka jingia lang iasuk (peace meeting)” ong u Singh.
U Singh u pyntip ba kane ka jingialang iasuk ka dei ban long hynne ka step por 9 baje ha shnong Tahpat, kaba la kam trai da ka Assam hynrei ym shym la don pat ki nongshongshnong ka Tahpat kiban wan sha kane ka jingialang watla ki paidbah na Lapangap kila leit sha katei ka shnong ban iakren iasuk ia kane ka kam.
“Hynrei, ka kynhun kaba don kumba 150 ngut eiei na ka thain Lapangap, kila leit sha katei ka jaka ba thungdieng bad kila jynrat lut ia kine ki dieng” ula iathuh haba bynrap “Ki Pulit kin don beit ha kane ka jaka mynta ka sngi ban peit thuh ia ka jinglong jingman khnang ba kan nym pynmih ia kano kano ka huri hura”.
U Deputy Commissioner ula ong ba ki Bor District na baroh arliang, kila tehlakam iala ki jong ki briew khnang ban lait na kano kano ka huri hura hapdeng jong ki. “Ia mynta, ki Magistrate na Karbi Anglong ha ryngkat u SP kila don ha katei ka jaka bad na ngi ruh kumjuh, ki border magistrate bad ki Pulit kila iadonlang bad ka jinglong jingman kala jai jai” ula bynrap.
Haba kylli, u Deputy Commissioner ula pyntip ba kane ka jingialang iasuk kan sa long noh lashai ka sngi hapdeng ki artylli ki Shnong khnang ba kin lah ban iapynbeit ia kiei kiei baroh.
U iathuh ruh “Ka jingialang kala long ruh ha ka kyrdan u DC bad SP bad mynta ngi kwah ban pynlong sa ia ka jingialang iasuk hapdeng I shnong khnang ba ki Rangbah Shnong bad ki Nongkitkam kin iashong lang bad iapynbeit ym tang ia ka kam thung jingthung hynrei ban kiar ruh ia kino kino ki jingiakynad lashai lashisngi bad ban bat ia ka hukum status quo”.
“Ha ki jingialang kiba la dep, la kren shai ba dei ban pynneh ia ka status quo tad haduh ba ki ar Sorkar kila pynbeit ia ka kam bad bay m dei ruh ban leh ia kano kano ka kam na baroh arliang ha katei ka jaka” ula bynrap.
Halor ka jingkynnoh ba ki Pulit ka Assam kila siat ia ki tyndong lyer pynsat khmat, u DC ula ong ba um pat ioh jingtip satia ba don kum katei ka jingjia.
“La kane ka jaka thung jingthunng ka hap ha Meghalaay ne Assam, ka long kaba eh ia nga ban ong naba ki Sorkar Jylla ki dang iakren ia kane ka kam” ula ong haba bynrap “ Ha ka jingshisha, ka Lapangap hi ka hap ha Meghalaya hynrei ha kane ka jaka thung jingthung, u don u lum uba iakam trai na baroh arliang”.
U Nongialam ka Khasi Students Union (KSU) ula pynpaw ba ka seng ka ai ia ka jingkyrshan kaba pura ia ka Dorbar Shnong Lapangap ban pyrshah ia ka jingwan kyntur pud beain jong ki paid Karbi.
“Ki (Karbi) la wan kyntur shapoh u pud u sam ka shnong Lapangap bad ngi la leit ban pynpra ia baroh ki jingtei bad jynrat ia baroh ki synbai dieng bala thung. Watla ki Pulit ka Assam kila siat tyndong lyer pynsat khmat, ngin ym kynran dien satia bad ngin iai bteng ban iada iala ka jong ka bri” ula ong.
“Ngi phah ruh ia ka khubor kaba shai sha ka Sorkar ba lada kim lah ban pynbeit ia kane ka kam, kan pynbor ia ngi ban leh ia kaba donkam ha kabna iada iala ka jong ka khyndew bad ia ki briew lajong. Ka KSU kan nym rieh ban iada iala ki jong ki briew” ula ong.
U General Secretary ka JSU Neilkee Mukhim ula kynnohba ki paid Karbi ba sah marjan ka shnong Lapangap kila wan thung dieng beain da ki taiew wat hapdeng ka jingiateh kular hapdeng ki bor Distrct ka West Jaintia Hills bad West Karbi Anglong ban pynneh ia ka status quo.
 kaba wan thungdieng ban shna jingshna ha Loom Pynthor- ka daw bah ba pynmih ia ka jingiakynad ha khappud ha ka step sngi Balang.){kind=link}