Shillong Naiwieng 03: U Myntri uba khmih ia ka tnad Bording u Bah Metbah Lyngdoh ula pynthikna ia ki nongshong shnong ba ka jingpynlip ia ka bording elektrik kadei kaba shipor kaba la leh kum ka sienjam ban pynthymmai ia ki kor ki bor bad ka jingpyntreikam ia ka skhim kaba thymmai.
Haba iakren bad ki lad pathai khubor hynne ka sngi Nyngkong, u Bah Metbah Lyngdoh ula batai ba kala don jingpynlip ia ka bording hynrei kam dei satia pat ka Load Shedding ne ka jingpynlip bording kaba bun kynta, hynrei kadei ka jingtreikam ban pyntreikam ia ki sainar kiba thymmai bad ia ki Substation.
Ki jaka kiba la shah ktah kidei kila da pyntip lyngba ki Rangbah Shnong bad ki Sordar, ula bynrap.
U Myntri ula shimkhia bha ia kane ka mat bad u ngeit skhem ba ka Meghalaya Energy Corporation Limited (MeECL) kala leh ia kaba bha tam ban pynduna ia kane ka jingthud.
Ula khmih bniah ia ka jinglong jingman bad thmu ban iatai shuh shuh ban pynthikna ba kan ym don ka jingthud ha ka jingpynbiang ia ka bording elektrik wat ha ka aiom tyrkhong.
“Ngi ngin pyrshang ba kan ym don ka jingpynlip ia ka bording elektrik wat ha ka por jong ka aiom tyrkhong” la ong u Bah Lyngdoh bad ka khmih lynti ban bit ban biang ka jinglong jingman ha ka jingpynbiang ia ka bording elektrik hapoh ka jylla.
Ula kular ban sam ia ki jingtip ha kaba iadei bad ka jingiaid shaphrang ki kam ki jam ha ki taiew ban wan bad pynthikna ia ki nongshong shnong ba ka sorkar ka iengskhem ban don kyrhai ia ka jingsam ia ka bording elektrik.
